မန္တလေး တိုင်း၊သပိတ်ကျင်းမြို့နယ် ပိုးဇနွယ်ရွာကို စစ်ကောင်စီတပ်က ဇူလိုင် ၁၄ ရက် ညနေ ၅ နာရီ ၁၈ မိနစ်မှာ လေကြောင်းဗုံးကြဲခဲ့တာကြောင့် ကလေးငယ် ၅ ယောက်အပါအဝင် ၆ ယောက် သေဆုံးခဲ့တယ်လို့ သိရပါတယ်။
ပြည်သူ့လွတ်မြောက်ရေးတပ်မတော် PLA ၂၂၂ တပ်ရင်း တာဝန်ရှိသူတယောက်က “ပိုးဇနွယ်ရွာက လီဆူလူမျိုးတွေနေတဲ့အပိုင်းကို ကြဲသွားတာပါ။ ၄ လသားအရွယ်ကလေးရယ်၊ ၁၁ နှစ်နဲ့ ၁၄ နှစ် အရွယ်ကလေး ၂ ယောက်ရယ်၊ သူတို့မိခင်၊ မိသားစု ၄ ဦးသေဆုံးတယ်။ သူတို့အိမ်ကို အလည်လာတဲ့ ကလေး ၂ ယောက်လည်းသေဆုံးတယ်။ ဗုံးခိုကျင်း တည့်တည့်ကျတာ၊ မွေးကင်းစကလေးက ယောကျ်ားလေး၊ သူ က အစအန အကုန်ကျေသွားတယ်” လို့ ပြောပါတယ်။
သေဆုံးသွားသူတွေက ဒေါ်ဟွမ်မဆီး (၄၅) နှစ်၊ သားသမီးတွေဖြစ်တဲ့ မသောင်းမီးသာ (၁၄) နှစ်၊ မသောင်းမလေး (၁၁) နှစ်၊ ၄ လအရွယ် မောင်သောင်းစာ နဲ့ အိမ်အလည်လာသူ မဟဲဘိုမီး (၁၄) နှစ်၊ မနောမစာ (၁၂ နှစ်) တို့ ဖြစ်တယ်လို့ သိရပါတယ်။
ဒါ့အပြင် လေကြောင်းတိုက်ခိုက်မှုကြောင့် ပိုးဇနွယ်ရွာက နေအိမ်တလုံးမီးလောင်ပြီး ၄ လုံးပျက်စီးခဲ့ကာ အမျိုးသားတယောက်နဲ့ အမျိုးသမီးတယောက် ဒဏ်ရာရခဲ့တယ်လို့ သိရပါတယ်။
ဒါ့အပြင် ဖော့တောရွာက ပြည်သူ ၄ ယောက် ထိခိုက်ဒဏ်ရာရခဲ့ပြီး နွားတကောင် သေဆုံးခဲ့တယ်လို့ သိရပါတယ်။
ဗုံးကြဲခံရတဲ့ ပိုးဇနွယ်ရွာက မန္တလေးမိုးကုတ်လမ်းမကြီးပေါ်က ရွာတရွာဖြစ်ပြီး သပိတ်ကျင်းမြို့နယ်နဲ့ မိုးကုတ်မြို့နယ်အစပ်က ရွာဖြစ်ပါတယ်။
