မကွေးတိုင်း၊ ပခုက္ကူမြို့ပေါ် ခရိုင်မီးသတ်ရုံးမှာ တပ်စွဲနေကြတဲ့ စစ်ကောင်စီတပ်နဲ့ ပျူစောထီးတွေ စီးနင်းလာတဲ့ မော်တော်ယာဥ် ၂ စီးတို့ကို ဇွန် ၁ ရက်က တိုက်ခိုက်ခဲ့ရာ ၁၀ ယောက်ထက်မနည်း သေဆုံးခဲ့ပြီးလက်နက်ခဲယမ်းတချို့ သိမ်းဆည်းရရှိခဲ့တယ်လို့ တော်လှန်ရေးတပ်ဖွဲ့ဝင်တွေဆီကနေ သိရပါတယ်။

ဇွန် ၁ ရက် မနက် ၃ နာရီခွဲလောက်မှာ ပခုက္ကူ ပကဖ  တပ်ရင်း ၁ နဲ့ မဟာမိတ်တွေ ပူးပေါင်းပြီး ပခုက္ကူမြို့ ခရိုင်မီးသတ်ရုံးမှာ တပ်စွဲနေတဲ့ စစ်ကောင်စီတပ်ဖွဲ့ဝင်တွေကို အနီးကပ် ပစ်ခတ်တိုက်ခိုက်ခဲ့ကြသလို မနက် ၈ နာရီလောက်မှာလည်း ဆင်မင်းရွာ စကစဂိတ်ကို ဂျူတီလဲဖို့ လာတဲ့ ပျူစောထီးကားတွေကို ကြားဖြတ်တိုက်ခိုက်ခဲ့တာလို့  ပခုက္ကူမြို့နယ် ပြည်သူ့ကာကွယ်ရေးအဖွဲ့ တပ်ရင်း ၁ ရဲ့ ပြန်ကြားရေးတာဝန်ခံ ကိုသောကြာက ပြောပါတယ်။ 

ပခုက္ကူ ပကဖ တပ်ရင်း ၁၊ Shwe Nyar Myae PDF၊ နယ်စည်းမခြား ပြည်သူ့ကာကွယ်ရေးတပ်ဖွဲ့နဲ့ မြိုင်ပကဖ တပ်ရင်း ၃၊ တပ်ခွဲ ၄ တို့ ပူးပေါင်းပြီး ပခုက္ကူမြို့ပေါ်က ခရိုင်မီးသတ်ရုံးတိုက်ပွဲမှာ စစ်ကောင်စီတပ်ဖွဲ့ဝင် ၅ ယောက်ထက်မနည်း သေဆုံးပြီး ၅ ယောက်ထက်မနည်း ထိခိုက်ဒဏ်ရာရရှိခဲ့ပါတယ်။

ပခုက္ကူမြို့နယ် ပြည်သူ့ကာကွယ်ရေးအဖွဲ့၊ ပခုက္ကူခရိုင် တပ်ရင်း ၁၆ နဲ့ ဗိုလ်ကလယ် တပ်ပေါင်းစုတို့ ပူးပေါင်းပြီး ပျူစောထီးတွေ လိုက်ပါလာတဲ့ မော်တော်ယာဥ်တွေကို ပစ်ခတ်မှုမှာတော့ ပျူစောထီး ခေါင်းဆောင် အပါအဝင် ၅ ယောက် သေဆုံးပြီး MA3 သေနတ် ၁ လက်၊ ပစ္စတိုသေနတ် ၁ လက်နဲ့ ဆက်စပ်ခဲယမ်းတွေအပြင် ငွေကျပ် ၃၁ သိန်းတို့ကိုလည်း သိမ်းဆည်းရရှိခဲ့​တယ်လို့ ဆိုပါတယ်။

ပခုက္ကူမြို့နယ် ပြည်သူ့ကာကွယ်ရေးအဖွဲ့ရဲ့တာဝန်ခံ စင်ယော် က “ခရိုင်မီးသတ်ရုံးကို တိုက်ခိုက်ခဲ့တဲ့ပွဲက နာရီဝက်လောက် ကြာတယ်။ ပစ်ခတ်နေတဲ့အချိန်မှာ သူတို့ဘက်က တပ်မ ၁၀၁ စစ်ကူတွေရောက်လာလို့ ကျနော်တို့တွေ ပြန်ဆုတ်ခဲ့ရတယ်။ ကျနော်တို့ ပစ်ခတ်လို့ သူတို့ဘက်က အသေအပျောက်စာရင်းကို မနက်မိုးလင်းမှ သိရတာပါ။ ဆင်မင်းရွာ စကစဂိတ်မှာ တာဝန်ချိန်းဖို့လို့ ပခုက္ကူကနေ ဆင်မင်းရွာဘက်ကို မတ်တူးကား ၂ စီးနဲ့ ထွက်လာတဲ့ ပျူတွေကို အဲဒီ ဆင်မင်းဂိတ်နားမှာဘဲ ဖြတ်တိုက်ခဲ့တာ။ မိုင်းဆွဲတာ မဟုတ်ဘူး။ ဂန်းတွေနဲ့ပဲ ပစ်ခဲ့တာ ၄၅ မိနစ်လောက် ကြာခဲ့တယ်။ အဲဒီကားတွေပေါ်မှာ ပါလာတာ ၈ ယောက်ထဲက ၄ ယောက် ထွက်တော့ လွတ်သွားတယ်။ တန်းသေတဲ့ ၄ ယောက်ထဲမှာ ပခုက္ကူမြို့ပေါ်က ၂ ရပ်ကွက်၊ နေပြည်တော်လမ်းမှာ နေတဲ့ ပျူစောထီးခေါင်းဆောင် ကျော်စိုးနိုင် ပါတယ်” လို့ ပြောပါတယ်။

ထွက်ပြေးသွားတဲ့ စစ်ကောင်စီတပ်ဖွဲ့ဝင် ၄ ယောက်ထဲက  ၁ ယောက်က ဒဏ်ရာရလို့ ပခုက္ကူဆေးရုံ တက်ကုရတာ နောက်ရက်မှာ ထပ်သေသွားလို့ သေဆုံးသူ ၅ ယောက် ရှိတယ်လို့ ဆိုပါတယ်။ 

တိုက်ပွဲမှာ သေဆုံးသွားတဲ့ ပျူစောထီးခေါင်းဆောင် ကျော်စိုးနိုင်ရဲ့ ရုပ်အလောင်းကို စစ်ကောင်စီ တပ်ဖွဲ့ဝင်တွေက လာရောက်သယ်ဆောင်သွားပြီး ဇွန် ၂ ရက် မနက်ပိုင်းမှာ သူတို့မိသားစုဝင်တွေကပဲ သင်္ဂြိုဟ်လိုက်ပါတယ်။

ပျူစောထီးခေါင်းဆောင်နဲ့ အဖွဲ့ဝင်တွေ ပစ်ခတ်ခံရအပြီး စစ်ကောင်စီဘက်က ဆင်မင်းကျေးရွာ ဂိတ်စခန်းကို စစ်ကာင်စီတပ်ဖွဲ့ဝင်အင်အား အများအပြား တိုးမြှင့်ချထားနေလို့ ပြည်သူတွေအနေနဲ့ အသွားအလာတွေ သတိရှိကြဖို့  တော်လှန်ရေးတပ်ဖွဲ့ဝင်တွေက တိုက်တွန်းပါတယ်။

တိုက်ခိုက်ခံရတာတွေနဲ့ပတ်သက်ပြီး စစ်ကောင်စီဘက်က သတင်းထုတ်ပြန်လာတာ မတွေ့ရသေးသလို စစ်ကောင်စီလက်အောက်ခံတွေ သေဆုံးဒဏ်ရာရမှုအရေအတွက်ကိုလည်း သီးခြားအတည်မပြုနိုင်သေးပါဘူး။