ရှမ်းပြည်နယ်တောင်ပိုင်း၊ ညောင်ရွှေမြို့နယ် အင်းလေးဒေသထဲမှာရှိတဲ့ Myanmar Treasure Resort ဟာ ဧပြီ ၃ ရက်နေ့ ညနေမှာ တောမီးကနေတဆင့် မီးလောင်ကျွမ်းမှုဖြစ်ခဲ့တယ်လို့ ဒေသခံတွေက ပြောပါတယ်။
ညနေ ၂ နာရီမှာ တောမီးကတဆင့်ကူးစက်ပြီး ၅ နာရီမှာ ဟိုတယ် မီးစလောင်ကာ၊ ညနေ ၆ နာရီကျော်အထိ မီးလောင်ကျွမ်းနေဆဲဖြစ်ပြီး ပျက်စီးဆုံးရှုံးရမှု အသေးစိတ်ကို ဆက်လက်စုံစမ်းနေဆဲ ဖြစ်ပါတယ်။
ဒေသခံတယောက်က “တောမီးကနေ စလောင်တယ်ပြောတယ်။ အကုန်လုံးနီးပါးလောင်သွားတယ်လို့ ကနဦးသိရတယ်။ မီးက ခုထိ မငြိမ်းသေးဘူး။ ရွာသားတွေလည်း သွားငြိမ်းကူကြတယ်” လို့ ပြောပါတယ်။
Myanmar Treasure Resort က အင်းလေး အရှေ့ဘက်ကမ်း မိုင်းသောက်ကျေးရွာမြောက်ဘက် မကျည်းစင်ရွာအနီးမှာ ရှိတယ်လို့ သိရပါတယ်။
အဆိုပါဟိုတယ်က အင်းလေးဒေသတွေထဲက ငလျင်ကြောင့် ထိခိုက်ပျက်စီးမှုမရှိတဲ့အတွက် ဆက်လက်ဖွင့်လှစ်ထားလို့ ခရီးသွားဧည့်သည်တွေရှိနိုင်ပြီး မီးလောင်မှုကြောင့် လူသူထိခိုက်ရမှု ရှိမရှိကိုတော့ ဆက်လက် စုံစမ်းနေပါတယ်။
အင်းလေးဒေသမှာ ငလျင်ကြောင့် ပြည်သူ ၁၀၀ ကျော် သေဆုံးခဲ့ရပြီး နေအိမ်များစွာ ထိခိုက်ပျက်စီးခဲ့ရတဲ့အပြင် ဒီနေ့မှာတော့ ဟိုတယ်တခုလည်း တောမီးကြောင့် မီးလောင်ပျက်စီးခဲ့ရပါတယ်။
