ရှမ်းပြည်တောင်ပိုင်း ပင်လုံမြို့မှာ ဧပြီ ၁ ရက် မနက်က ဆိုင်ခန်းနဲ့ တွဲထားတဲ့ နေအိမ်တလုံး မီးလောင်မှုဖြစ်ပွားပြီး လူ ၃ ယောက် သေဆုံးသွားပါတယ်။
ပင်လုံမြို့ ရပ်ကွက် ၁ ဈေးကြီးအရှေ့ဘက်က သင်္ကန်းပရိက္ခရာ ရောင်းတဲ့ အိမ်မှာ ကနေ့ မနက် ၁ နာရီကျော်လောက်က မီးလောင်နေတာ စတင်တွေ့ရှိပြီး ရပ်ကွက်ထဲက လူတွေရော လွိုင်လင်၊ ပင်လုံ မီးသတ်တပ်ဖွဲ့ဝင်မှ မီးသတ်ကားပေါင်း ၅ စီးနဲ့ လာရောက်ငြှိမ်းသတ်ရာမှာ မနက် ၅ နာရီလောက်မှ မီးညွန့်ကျိုးသွားတယ်လို့ ပင်လုံဒေသခံက ပြောပါတယ်။
“မီးက သူတို့အိမ်အနောက်ဘက် အဖီဆွဲထားတဲ့နေရာကနေ စလောင်တယ်။ အိမ်ရှင်တွေက အိပ်ပျော်နေတုန်း ဘေးချင်းကပ်ရက် အိမ်နီးချင်းက စတွေ့တာ။ အဲဒါနဲ့ သံချောင်းခေါက်ပြီး အသိပေးလိုက်တယ်။ ရပ်ကွက်ထဲက လူတွေလည်း ဝိုင်းငြှိမ်းတယ်၊ မီးသတ်ကားလည်း လာတယ်၊ ဒါပေမဲ့ အိမ်သား ၃ ယောက် ဆုံးသွားတယ်။ ဘယ်လိုဖြစ်ပြီး ဆုံးလဲတော့ မသိဘူး။ ဒီနေ့မနက် အဲဒီရှေ့ဖြတ်လာတော့ အမျိုးသမီး တယောက်နဲ့ အမျိုးသား တယောက် အလောင်းကို ကယ်ဆယ်ရေးအဖွဲ့က အပြင်ထုတ်လာတယ်၊ နောက်အသားစတွေလည်း ထုတ်လာတယ်။”
အဆိုပါအိမ်မှာ ၂ ထပ်ခွဲတိုက်အိမ်ဖြစ်ပြီး အောက်ထပ်မှာ ဆိုင်ခန်းတွဲ ၃ တွဲနဲ့ သင်္ကန်းပရိက္ခရာ ရောင်းချကြောင်း၊ အပေါ်ထပ်မှာ လူနေပြီး အနောက်ဘက်မှာတော့ မီးဖိုချောင်ရှိတယ်။ အဲဒီနောက်မှာ အိမ်ဆောက်အပိုပစ္စည်းတွေထားပြီး မီးက အဲဒီကနေ စလောင်တယ်။ အိမ်ရောဆိုင်ရော ဘာမှ မကျန်အောင်လောင်တယ်။ ဘေးအိမ်က နည်းနည်းကူးပြီး မီးမကူးအောင် အဆောက်အဦ ကြိုတင်ဖျက်ချတာကြောင့် ပျက်စီးမှုရှိတယ်၊ မီးလောင်တဲ့ အကြောင်းရင်းကိုတော့ သက်ဆိုင်ရာက စုံစမ်းနေဆဲပဲလို့ ဒေသခံက ပြောပါတယ်။
မီးလောင်မှုကြောင့် ဆုံးရှုံးမှု အိမ်ကြီးအိမ်ကောင်းဖြစ်တဲ့အပြင် ရောင်းကုန်ပစ္စည်းတွေပါ အားလုံးပါသွားတာကြောင့် ကျပ်ငွေသိန်းပေါင်းထောင်နဲ့ချီဆုံးရှုံးမယ်လို့ ဒေသခံတွေက ခန့်မှန်းပြောဆိုပါတယ်။
