တောင်ကိုရီးယားနိုင်ငံမှာ လူ ၃၀ ထက်မနည်း သေဆုံးပြီး သမိုင်းဝင်ဘုရားကျောင်းတွေ အပါအဝင် အဆောက်အအုံ ထောင်ပေါင်းများစွာ ပျက်စီးသွားတဲ့ လတ်တလော တောမီးလောင်ကျွမ်းမှုနဲ့ ပတ်သက်ပြီး တောင်ကိုရီးယား အာဏာပိုင်တွေဟာ မတ် ၃၁ ရက်က အခင်းဖြစ်တဲ့နေရာမှာ ပူးတွဲစစ်ဆေးမှု လုပ်ဆောင်ခဲ့ပါတယ်။
အရှေ့တောင်ပိုင်း အွီဆောင်းကောင်တီမှာ မတ် ၂၂ ရက်က မိသားစုသင်္ချိုင်းမှာ ဘိုးဘွားကန်တော့ပွဲ အခမ်းအနား ကျင်းပနေချိန်မှာ အသက် ၅၀ ကျော်အရွယ် အမျိုးသားတယောက်ကြောင့် မီးစတင်လောင်ကျွမ်းခဲ့တယ်လို့ အာဏာပိုင်တွေက ယူဆထားကြောင်း ဂျောင်ဘွတ်ခရိုင်ရဲတပ်ဖွဲ့ တာဝန်ရှိသူတယောက်က ပြောပါတယ်။
ရဲတပ်ဖွဲ့နဲ့အတူ မီးသတ်ဌာနနဲ့ အမျိုးသားမှုခင်းဌာနတို့ဟာ မီးလောင်ရခြင်း အကြောင်းအရင်းကို သိရှိရဖို့အတွက် ကနဦး မီးစတင်ရှို့တဲ့နေရာတဝိုက် ဧရိယာက နမူနာတွေကို ကောက်ယူကာ အထောက်အထားတွေ စိစစ်ဖို့ စီစဉ်ထားကြောင်း ပြည်တွင်းမီဒီယာတွေက ပြောပါတယ်။
ဒီနေ့ စစ်ဆေးမှုရလဒ်တွေအပေါ် အခြေခံပြီး နောက်ထပ် စုံစမ်းစစ်ဆေးမှုတွေ လုပ်ဆောင်ဖို့ စီစဉ်ထားပါတယ်လို့ တောင်ကိုရီးယားရဲအရာရှိ ဂင်မ် ဂယူအွန်းက ပြောပါတယ်။
အွီဆောင်း မီးလောင်မှုအပြင် ပြီးခဲ့တဲ့သီတင်းပတ်က နိုင်ငံတဝန်း သီးခြား မီးလောင်ကျွမ်းမှုတွေကြောင့် ဒီလိုဘေးအန္တရာယ်တွေကို ပိုမိုကောင်းမွန်စွာ ကိုင်တွယ်ဖြေရှင်းနိုင်ဖို့ အမျိုးသားပြုပြင်ပြောင်းလဲမှုတွေလုပ်ဖို့ တောင်းဆိုလာကြပြီး ပညာရှင်တွေကတော့ ရာသီဥတု ဖောက်ပြန်မှုကြောင့် ပိုမိုဆိုးရွားလာကြောင်း ပြောဆိုထားပါတယ်။
Source : Reuters
