
အမေရိကန်သမ္မတ ဒေါ်နယ်ထရမ့်ပ်က မြန်မာနိုင်ငံမှာ လှုပ်ခတ်ခဲ့တဲ့ မြေငလျင်နဲ့ပတ်သက်ပြီး မြန်မာတာဝန်ရှိသူတွေနဲ့ စကားပြောထားပြီးတော့ သူ့အုပ်ချုပ်ရေးပိုင်းကလည်း ပုံစံတမျိုးနဲ့ အကူအညီ ပေးလိမ့်မယ်လို့ မတ် ၂၈ ရက်မှာ ပြောကြားခဲ့ပါတယ်။
“ကျနော်တို့ ကူညီသွားမှာပါ” လို့ ထရမ့်ပ်က အိမ်ဖြူတော်မှာ သတင်းထောက်တွေကို ပြောကြားခဲ့ပါတယ်။
“ပြည်သူတွေကိုလည်း သတိပေးထားပြီးသားဖြစ်ပြီး ဖြစ်ပျက်ခဲ့တာတွေက အရမ်းဆိုးရွားပါတယ်။ တကယ့်ကို ဆိုးဆိုးရွားရွားဖြစ်ပြီးတော့ ကူညီပေးမှာပါ။ မြန်မာနိုင်ငံနဲ့လည်း စကားပြောထားပါတယ်” လို့ ထရမ့်ပ်က ပြောပါတယ်။
မြန်မာနိုင်ငံမှာ သောကြာနေ့က ပြင်းအား ၇ ဒသမ ၇ ရှိတဲ့ ငလျင်လှုပ်ခတ်ခဲ့လို့ လူ ၁,၀၀၀ ကျော် သေဆုံးခဲ့တယ်လို့ အာဏာပိုင်တွေက ပြောပါတယ်။
အိမ်နီးချင်း ထိုင်းနိုင်ငံမှာလည်း ဆောက်လုပ်ဆဲ မိုးမျှော်တိုက်တွေ အပါအဝင် ကျယ်ပြန့်တဲ့ နယ်မြေဧရိယာအနှံ့ရှိ အဆောက်အအုံတွေ ပြိုလဲကျတာ၊ အခြေခံအဆောက်အဦတွေ ထိခိုက်ပျက်စီးတာတွေလည်း ဖြစ်ပွားခဲ့ပါတယ်။
ငလျင်ရဲ့ ပြင်းအားနဲ့ အတိမ်အနက်ကို အခြေခံပြီး အမေရိကန်အစိုးရရဲ့ ခွဲခြမ်းစိတ်ဖြာမှုအရ စစ်ကိုင်းတိုင်းနဲ့ မိတ္ထီလာဒေသတွေမှာ အဆိုးဝါးဆုံး ထိခိုက်ခဲ့ပြီး သေဆုံးသူ ထောင်နဲ့ချီ ရှိနိုင်ကြောင်းနဲ့ စီးပွားရေး ဆုံးရှုံးမှုတွေ ဖြစ်နိုင်ကြောင်း ခန့်မှန်းထားပါတယ်။
Source : Reuters