ရန်ကုန်မှာ ရွှေဆိုင်တဆိုင်ကို ကော်သေနတ်နဲ့ ဓားပြတိုက်ခဲ့သူတွေကို အချိန် ၅ နာရီကျော်အကြာမှာ ဖမ်းဆီးရမိခဲ့တယ်လို့ စစ်ကောင်စီရဲ့ ပြန်ကြားရေးက သတင်းထုတ်ပြန်ပါတယ်။
မတ် ၂၃ ရက် ဒီနေ့ မနက် ၈ နာရီ ၄၅ မိနစ်က ရန်ကုန်၊ ပန်းဘဲတန်းမြို့နယ်၊ ၂၉ လမ်းနဲ့ လမ် ၃၀ ကြား၊ မဟာဗန္ဓုလလမ်းပေါ်က တိတ်ရှိန် ရွှေဆိုင်မှာ ဆိုင်ပိုင်ရှင်ရဲ့ သမီးဖြစ်သူ မမြတ်သဉ္ဇာမိုးဟာ ဆိုင်ဝန်ထမ်း အမျိုးသမီး ၇ ယောက်တို့နဲ့ အတူရှိနေတုန်း Mask တွေတပ်ဆင်ထားတဲ့ အမျိုးသား ၄ ယောက်ဟာ ဆိုင်အတွင်းဝင်ရောက်လာပြီး သေနတ်အတို ၁ လက်နဲ့ ကိုင်ဆောင်ခြိမ်းခြောက်ကာ မှန်ကောင်တာအတွင်းက ရွှေထည်ပစ္စည်း မျိုးစုံ ၂၀ ကျပ်သားလောက် (တန်ဖိုးငွေကျပ်သိန်း ၁၂၀၀ လောက်) ကို လုယက်ယူဆောင်ထွက်ပြေးသွား ခဲ့တာပါ။
သတင်းအရ ပန်းဘဲတန်းမြို့မရဲစခန်းမှာ အမှုဖွင့်ပြီး စုံစမ်းရာမှာ လုယက်မှုကျူးလွန်သူတွေဟာ YGN-42 AA-1938 နံပါတ်တပ်ဆင်ထားတဲ့ Toyota Corolla အမျိုးအစား အဖြူရောင် အငှားကားနဲ့ ပန်းဆိုးတန်းလမ်းဘက်ကို မောင်းနှင်ထွက်ပြေးသွားခဲ့တာကြောင့် စုံစမ်းရှာဖွေခဲ့ရာမှာ မနက် ၁၁ နာရီမှာ အဲဒီကားကို ယာဉ်မောင်းဖြစ်သူ စည်သူကျော်နဲ့အတူ လမ်းမတော်မြို့နယ်၊ ဝါးတန်းလမ်းနဲ့ အနော်ရထာလမ်းဆုံမှာတွေ့ရလို့ သက်ဆိုင်ရာက ထိန်းသိမ်းခေါ်ယူစစ်ဆေးခဲ့တယ်လို့ ဆိုပါတယ်။
ယာဉ်မောင်းဖြစ်သူရဲ့ထွက်ဆိုချက်အရ လုယက်မှုကျူးလွန်သူတွေကို ကျောက်တံတားမြို့နယ်၊ ကမ်းနားလမ်းနဲ့ ဗိုလ်အောင်ကျော်လမ်းဆုံကို ငွေ ၄,၀၀၀ ကျပ်နဲ့ လိုက်ပါပို့ဆောင်ပေးခဲ့တာကို သိရလို့ ဆက်ပြီး စုံစမ်းစစ်ဆေးခဲ့ရာမှာ မွန်းလွဲ ၂ နာရီ ၁၅ မိနစ်မှာ ဗိုလ်တထောင်မြို့နယ်၊ ဗိုလ်အောင်ကျော်လမ်းက Casa Myanmar Hotel မှာ လုယက်မှုကျူးလွန်သူတွေကို ဖမ်းမိခဲ့တယ်လို့ ထုတ်ပြန်ချက်မှာ ဖော်ပြပါတယ်။
မွန်ပြည်နယ်၊ ကျိုက်ထိုမြို့နယ်၊ ပတ္တမြားရပ်ကွက်နေ အသက် ၁၈ နှစ်အရွယ် လင်းသန့်အောင်၊ သထုံမြို့နယ်၊ ပေါ်တော်မူကျေးရွာနေ အသက် ၂၀ အရွယ် သက်ထူးဇင်၊ ရွှေပြည်သာမြို့နယ်၊ အမှတ် ၁၉ ရပ်ကွက်နေ အသက် ၁၉ နှစ်အရွယ် ကောင်းခန့်သူရ(ခ)ဝသုန်၊ ပဲခူးတိုင်း၊ ဒိုက်ဦးမြို့နယ်၊ စစ်ဗိုလ်ကြီးကျေးရွာနေ အသက် ၁၉ နှစ်အရွယ် မင်းခန့်ကို(ခ)ဖိုးကာတို့ကို လုယက်မှုကျူးလွန်ရာမှာသုံးခဲ့တဲ့ အနက်ရောင်ကော်သေနတ် ၁ လက်၊ သံဖြတ်လွှ ၃ ချောင်း၊ လုယက်ယူဆောင်လာတဲ့ ရွှေလက်ကောက်မျိုးစုံ ၅၁ ကွင်း၊ ရွှေလက်စွပ်မျိုးစုံ ၃၇ ကွင်းနဲ့အတူ တွေ့ရှိဖမ်းဆီးရမိတာလို့ ဆိုပါတယ်။
သူတို့ကို စစ်ဆေးချက်အရ သူတို့ဟာ မတ် ၂၀ ရက်နေ့မှာ Casa Myanmar Hotel ကို ရောက်ရှိတည်းခိုခဲ့ပြီး ငွေကြေးလိုအပ်ချက်အရ မဟာဗန္ဓုလလမ်းပေါ်က ရွှေဆိုင်တွေကို လုယက်ဖို့ အခြေအနေကြည့်ရှုခဲ့ကြပြီး တိတ်ရှိန်ရွှေဆိုင်ကို လုယက်ဖို့ ရွေးချယ်ခဲ့တာလို့ ဆိုပါတယ်။
လုယက်ရာမှာသုံးတဲ့ အနက်ရောင်ကော်သေနတ်ကိုတော့ ဆူးလေဘုရားအနီး၊ မဟာဗန္ဓုလလမ်းပေါ် စတိုးဆိုင်တဆိုင်ကနေ ဝယ်ယူခဲ့တာလို့လည်း ဆိုပါတယ်။
