ရန်ကုန်မြို့လယ်ကောင်၊ ပန်းပဲတန်းမြို့နယ်က တိတ်ရှိန်ရွှေဆိုင်ကို ဒီနေ့ မနက် ၉ နာရီဝန်းကျင်က အမျိုးသား ၄ ယောက်က ဓားပြတိုက်ခဲ့ရာ ရွှေထည်ပစွည်းတွေပါသွားတယ်လို့ မြို့ခံတွေဆီက သိရပါတယ်။

ဒီနေ့မနက် ၉ နာရီဝန်းကျင်က ပန်းပဲတန်းမြို့နယ်၊ ၆ ရပ်ကွက်၊ ၂၉ လမ်းနဲ့ လမ်း ၃၀ ကြား၊ မဟာဗန္ဓုလလမ်းပေါ်ရှိ တိတ်ရှိန်ရွှေဆိုင်ကို Mask တပ်ထားတဲ့ အမျိုးသား ၄ ယောက်က သေနတ်နဲ့ ခြိမ်းခြောက်ပြီး ဓားပြတိုက်ခဲ့တာလို့ မြို့ခံတယောက် ပြောပါတယ်။

“ဆိုင်ဖွင့်ချိန်ကြီး ဓားပြဝင်တိုက်သွားတာ၊ ဆိုင်မှာရှိတဲ့ ဝန်ထမ်းတွေကို သေနတ်နဲ့ချိန်ပြီး ရွှေတွေ ယူသွားတာ၊ ဘယ်လောက်ပါသွားလဲတော့ မသိဘူး။ စစ်တပ်ရော၊ ရဲတွေရော ဆူးလေကနေ မော်တင်အထိ စစ်နေတယ်။” 

အမည်မသိ အမျိုးသား ၄ ယောက်မှာ တိတ်ရှိန်ရွှေဆိုင်ထဲကို ဝင်လာပြီး တယောက်က ဆိုင်ရှင်နဲ့ ဝန်ထမ်းတွေကို သေနတ်နဲ့ချိန်ကာ ထိုင်ခိုင်းထားပြီး ကောင်တာထဲက ရွှေတွေ ယူသွားတာလို့ ရဲတပ်ဖွဲ့နဲ့နီးစပ်တဲ့ သတင်းအရင်းအမြစ်က ပြောပါတယ်။

“ဆိုင်ရှင်ရော ဝန်ထမ်းတွေရောရှိတဲ့အချိန် ဓားပြဝင်တိုက်တာ။ သေနတ်တွေလည်း ပါတယ်။ ဆိုင်က ရွှေထည် သိန်းထောင်ကျော်ဖိုး ပါသွားတယ်။ CCTV မှတ်တမ်းအရ စစ်ဆေးနေတယ်” လို့ ပြောပါတယ်။

လတ်တလောမှာ စစ်ကောင်စီတပ်နဲ့ ရဲတွေက ပိုင်ရှင်ဖြစ်သူ ဦးမိုးအောင်ကို စစ်မေးနေပြီး ရွှေဆိုင် CCTV မှတ်တမ်းယူကာ ဆူးလေဘုရားလမ်းနဲ့ မော်တင်ဘက်မှာ ပိတ်ဆို့စစ်ဆေးတယ်လို့ မြို့ခံတွေက ပြောပါတယ်။

အခုနှစ် ဇန်နဝါရီ ၈ ရက်ကလည်း ပန်းဘဲတန်းမြို့နယ်၊ အမှတ် ၇ ရပ်ကွက်၊ လမ်း ၃၀ အလယ်ဘလောက် ပထမထပ်မှာ ဖွင့်လှစ်ထားတဲ့ ရွှေချစ်သူရွှေဆိုင်ကို အမျိုးသား ၃ ယောက်က ဓားပြတိုက်ပြီး ရွှေထည်ပစ္စည်း သိန်းတသောင်းကျော်ဖိုး ယူသွားတဲ့အမှုလည်း ခုချိန်ထိ မမိသေးပါဘူး။

စစ်တပ် အာဏာသိမ်းပြီး ၂၀၂၁ ကနေ ၂၀၂၅ ခုနှစ်အတွင်း ရန်ကုန်တိုင်းအတွင်းရှိ မြို့နယ်တချို့က ရွှေဆိုင် ၁၆ ဆိုင်အထိ ဓားပြတိုက်ခံထားရပါတယ်။