နိုင်ငံတကာ အရေးယူပိတ်ဆို့ဒဏ်ခတ်မှုတွေ ကြုံတွေ့နေရသလို တဖက်မှာလည်း နယ်စပ်ဒေသတွေ ဆုံးရှုံးထားတာကြောင့် နယ်စပ်ကုန်သွယ်ရေး ကျဆင်းနေချိန်မှာ စစ်ကောင်စီဟာ ပြည်ပပို့ကုန်မြှင့်တင်ရေးအကောင်အထည်ဖော်မယ့် အမျိုးသားပို့ကုန်မဟာဗျူဟာ (၂၀၂၆ - ၂၀၃၀) ကို ရေးဆွဲသွားမယ်လို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက သိရပါတယ်။
အမျိုးသားပို့ကုန်မဟာဗျူဟာ (၂၀၂၀-၂၀၂၅) ရဲ့ သက်တမ်းက မကြာခင် ပြီးစီးတော့မှာ ဖြစ်တာမို့ အဲဒီကာလအတွင်း ဆောင်ရွက်ခဲ့တဲ့ လုပ်ငန်းစီမံချက်တွေအပေါ် ဆန်းစစ်ပြီး လက်ရှိအခြေအနေနဲ့ ကိုက်ညီအောင် ပြင်ဆင်ဖြည့်စွက်ထားတဲ့ လုပ်ငန်းစီမံချက်တွေကို အမျိုးသားပို့ကုန်မဟာဗျူဟာ (၂၀၂၆ - ၂၀၃၀) မှာ ထည့်သွင်း ရေးဆွဲသွားမယ်လို့ သိရပါတယ်။
စစ်ကောင်စီဟာ ၂၀၂၄ ခုနှစ် ဖေဖော်ဝါရီလက အမျိုးသားပို့ကုန်မဟာဗျူဟာ အစိုးရ - ပုဂ္ဂလိက ပို့ကုန်မြှင့်တင်ရေးကော်မတီကို ဖွဲ့စည်းပြီး ပို့ကုန်တိုးမြှင့်ရေး ဆောင်ရွက်ခဲ့တာပါ။
ဒါပေမဲ့ ၂၀၂၄-၂၀၂၅ ဘဏ္ဍာနှစ်အတွက် ကုန်သွယ်မှုပမာဏကို အမေရိကန်ဒေါ်လာ ၃၃ ဘီလီယံ လျာထားချက်ရှိခဲ့ပေမဲ့ ၂၀၂၅ မတ် ၁၂ ရက်အထိ ၂၅ ဒသမ ၇၉၃ ဘီလီယံသာ ပြည့်မီနိုင်ခဲ့တယ်လို့ မတ် ၁၈ ရက်က ပြုလုပ်တဲ့ အမျိုးသားပို့ကုန်မဟာဗျူဟာ အစိုးရ - ပုဂ္ဂလိက ပို့ကုန်မြှင့်တင်ရေးကော်မတီ (၁/၂၀၂၅) ကြိမ်မြောက် အစည်းအဝေး မှတ်တမ်းအရ သိရပါတယ်။
စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကတော့ မြန်မာနိုင်ငံမှာ ပြည်ပို့ကို တင်ဖို့နိုင်မယ့် ထုတ်ကုန်တွေအတွက် ကုန်ကြမ်းတွေရှိနေပြီး မြန်မာနိုင်ငံ ပတ်ဝန်းကျင်မှာ လူဦးရေ ၄ ဘီလီယံလောက် ရှိတာကြောင့် ဖိနပ်ထုတ်ရောင်းရင်တောင် ဈေးကွက်အလားအလာရှိကြောင်း၊ စီးပွားရေးမှာ ရှာရှာကြံကြံလုပ်ရမှာ ဖြစ်ကြောင်း ပြောကြားခဲ့ပါတယ်။
ပြီးခဲ့တဲ့ ရက်ပိုင်းက နေပြည်တော်မှာကျင်းပတဲ့ “၂၀၂၅ အလွန် ဗဟုဝင်ရိုးကမ္ဘာမှာ မြန်မာနိုင်ငံ ကြုံတွေ့လာရမည့် စိန်ခေါ်မှုများနှင့် အခွင့်အလမ်းများ သုံးသပ်ဆွေးနွေးပွဲ” မှာ ပြောကြားခဲ့တာ ဖြစ်ပါတယ်။
