မန္တလေးတိုင်း၊  မြင်းခြံမြို့ ၊ အမှတ်၁၅ ခြေမြန်တပ်ရင်းရဲ့ တပ်ဂိတ်ကို  မတ် ၁၇ ရက်နေ့ ညနေ ၃ နာရီလောက်က ပြောက်ကျားစနစ်နဲ့ တိုက်ခိုက်ခဲ့တယ်လို့ Myingyan Black Tiger အဖွဲ့ဆီက သိရပါတယ်။

ခမရ ၁၅ တပ်ရင်းရှေ့က စစ်ကောင်စီရဲ့တပ်ဂိတ်ကို သွားရောက်တိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင် ၃ ယောက်သေဆုံးပြီး အများအပြားဒဏ်ရာရရှိခဲ့တယ်လို့  ဆိုပါတယ်။

Myingyan Black Tiger ဗိုလ်မိုက်ခဲက “ပြောက်ကျားစနစ်နဲ့ ဝင်ရောက်တိုက်ခိုက်ခဲ့တာ။ စစ်ကောင်စီတပ်ဖွဲ့ဝင် ၃ ဦးကတော့ နေရာမှာပွဲချင်းပြီးပဲ။ ဒဏ်ရာရထားသူလည်း အများအပြားရှိတယ်။ နောက်ထပ်သေဆုံးမှုကိုတော့ စုံစမ်းနေတုန်းပဲ” လို့ DVB ကို ပြောပါတယ်။

စစ်ကောင်စီ စစ်ဆေးရေးဂိတ်တိုက်ခိုက်ခံရပြီး ထိခိုက်သေဆုံးမှုအခြေအနေကို DVB က သီးခြားအတည်မပြုနိုင်သေးပါဘူး။

အဲဒီတိုက်ခိုက်မှုကို Myingyan Black Tiger တော်လှန်ရေးတပ်ဖွဲ့နဲ့ Anyar Federal Task Force ဝံပုလွေမဟာမိတ်ပူးပေါင်းတော်လှန်ရေးတပ်ဖွဲ့တို့ ပူးပေါင်းတိုက်ခိုက်ခဲ့တာလို့ ဆိုပါတယ်။

ပြီးခဲ့တဲ့ ဖေဖော်ဝါရီ ၂၆ ရက်နေ့ကလည်း ချင်းတွင်းမြစ် အရှေ့ဘက်ရှိ ရေစကြိုမြို့နယ် ရေလယ်ကျွန်းဒေသကို စစ်ကြောင်းထိုးဝင်ရောက်လာတဲ့ စစ်ကောင်စီ စစ်ကြောင်းကို ကြားပြတ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၉ ယောက်သေဆုံးခဲ့ပြီး ၉ ယောက် အရှင်ဖမ်းဆီးရမိခဲ့တယ်လို့ MBT တော်လှန်ရေးတပ်ဖွဲ့တွေဆီက သိရပါတယ်။