ရန်ကုန်-မန္တလေး လမ်းဟောင်းပေါ်က စစ်ကောင်စီတပ်ဖွဲ့တွေ အခြေချတပ်စွဲထားတဲ့ ဂိတ်စခန်း ၇ ခုကို တိုက်ခိုက်ခဲ့တဲ့အတွက် စစ်ကောင်စီတပ်သား ၈ ယောက် သေဆုံးပြီး ၂ ယောက် ဒဏ်ရာရရှိခဲ့တယ်လို့ NUG ကာကွယ်ရေးဝန်ကြီးဌာန ပြည်သူ့ကာကွယ်ရေးတပ်မတော် စစ်ရုံးချုပ်က ဖေဖော်ဝါရီ ၂၇ ရက်မှာ ထုတ်ပြန်ပါတယ်။
စစ်ကောင်စီစခန်း ၇ ခုဟာ ပဲခူးတိုင်း၊ ကျောက်တံခါးမြို့နယ်နဲ့ ဖြူးမြို့နယ်အတွင်းမှာရှိပြီး ဖေဖော်ဝါရီ ၂၅ နဲ့ ၂၆ ရက်တွေမှာ တိုက်ခိုက်ခဲ့တာပါ။
အဲဒီစခန်းတွေကို တောင်ပိုင်းစစ်ဒေသ၊ အမှတ် ၂ စစ်ဒေသခွဲ လက်အောက်က အမှတ် ၃၇၀၂ တပ်ရင်း၊ အမှတ် ၃၅၀၂ တပ်ရင်း၊ Spring Warrior Column တပ်ရင်း၊ အာဠာဝကစစ်ကြောင်း၇၈၀၃၊ ဧရာဝတီစစ်ကြောင်း ၆၀၀၂၊ စစ်တောင်းစစ်ကြောင်း၊ ရန်ကုန် ပကဖ၊ ဖြူး ပကဖ အဖွဲ့တွေနဲ့ KNLA တပ်ရင်း ၉ တို့ ပူးပေါင်းတိုက်ခိုက်ခဲ့တယ်လို့ သိရပါတယ်။
တိုက်ပွဲတွေအတွင်းမှာ တော်လှန်ရေးတပ်ဖွဲ့တွေဘက်က ရဲဘော်တယောက်လည်း ကျဆုံးခဲ့ပါတယ်။
စစ်ရေးလှုပ်ရှားမှုတွေကို တိုးမြှင့်ဆောင်ရွက်သွားမှာ ဖြစ်တဲ့အတွက် ပြည်သူတွေအနေနဲ့ စစ်ကောင်စီတပ်ဖွဲ့တွေ၊ ဂိတ်စခန်းတွေရဲ့ အနီးဝန်းကျင်တွေကို မလိုအပ်ဘဲ သွားရောက်ခြင်း မပြုကြဖို့ကိုလည်း ပြည်သူ့ကာကွယ်ရေးတပ်မတော် (PDF)၊ စစ်ရုံးချုပ်က အသိပေး ထုတ်ပြန်ထားပါတယ်။
