စစ်ကိုင်းတိုင်း၊ မြောင်မြို့နယ်ထဲကို ဝင်ရောက်လာတဲ့စစ်ကောင်စီတပ်ဖွဲ့ဝင်တွေကို ဖေဖော်ဝါရီ ၂၆ ရက်နေ့ မနက် ၈ နာရီဝန်းကျင်မှာ စောင့်ကြိုတိုက်ခိုက်ခဲ့ပြီး စစ်ကောင်စီတပ်ဖွဲ့ဝင် ၅ ယောက် သေဆုံး၊ ၆ ယောက် ကို လက်နက်တွေနဲ့အတူ အရှင်ဖမ်းမိတယ်လို့ မြောင်အခြေစိုက် တော်လှန်ရေးတပ်ဖွဲ့ဝင်တွေက ဖေဖော်ဝါရီ ၂၈ ရက်နေ့ ညပိုင်းမှာ သတင်းထုတ်ပြန်ပါတယ်။

မြင်းမူမြို့ပြတော်လှန်ရေးအဖွဲ့ (MCRF) ရဲ့ ပြန်ကြားရေးတာဝန်ခံက “အင်အား ၁၆၀ လောက်ပါတဲ့ စစ်ကြောင်းက ချင်းတွင်းမြစ်အတိုင်းစက်လှေတွေနဲ့ကူးလာပြီးတော့ ရေစကြိုနဲ့မြောင်နယ်အစပ်ကို စစ်ကြောင်းထိုးလာတာကို ကျနော်တို့မြောင်နယ်ထဲက ရဲဘော်တွေက စောင့်ပြီးတိုက်ခဲ့ကြတာပါ” လို့ ပြောပါတယ်။

အဲဒီတိုက်ခိုက်မှုအတွင်း စစ်သားအလောင်း ၅ လောင်းတွေ့ရှိခဲ့သလို စစ်ကောင်စီတပ်ဖွဲ့ဝင် ၆ ယောက်ကို ၆၀ မမ စိန်ပြောင်း ၁ လက်၊ RPG 7 ၁ လက်၊ MA3 သေနတ် ၁ လက်၊ G3 သေနတ် ၁ လက်၊ တခြားစစ်အသုံးအဆောင်ပစ္စည်းတွေနဲ့အတူ အရှင်ဖမ်းဆီးရမိခဲ့တာဖြစ်တယ်လို့ ဆိုပါတယ်။

လို့ မြင်းမူမြို့ပြတော်လှန်ရေးအဖွဲ့ (MCRF) ရဲ့ တာဝန်ခံ ကိုလုလင် က “အဲဒီတုန်းက အပြန်အလှန်တိုက်ပွဲက ၄ နာရီလောက်ကြာခဲ့တယ်ဗျ။ ခွေးစစ်ကြောင်းဘက်က အတော်လေး အထိနာတယ်။ သူတို့စစ်ကြောင်းကကောင်တွေလည်း ပြေးသူပြေး ပြန်ဆုတ်တဲ့သူ ဆုတ်သွားတယ်။ တိုက်ပွဲမှာအထိနာလို့လည်း တိုက်လေယာဉ် ၁ စီးနဲ့ဗုံးကြဲသွားတယ်။ Mi 35 ၁ စီးနဲ့က ပစ်ကူပေးသွားတယ်။ ရေစကြိုမြို့ပေါ်ကနေလည်း ဟောင်ဝှစ်ဇာ အမြောက်တွေနဲ့ပစ်ကူပေးသေးတာဗျ။ တိုက်ပွဲထဲမှာ ကျနော်တို့ဘက်က ရဲဘော် ၄ ယောက်ကတော့ မစိုးရိမ်ရတဲ့ဒဏ်ရာတွေရခဲ့တယ်” DVB ကို ပြောပါတယ်။

အရှင်ဖမ်းဆီးရမိထားတဲ့ စစ်ကောင်စီတပ်ဖွဲ့ဝင်တွေကို စစ်သုံ့ပန်းဥပဒေနဲ့အညီထိန်းသိမ်းထားပြီး စစ်ဆေးမေးမြန်းနေတယ်လို့လည်း သူက ဆက်ပြောပါတယ်။

တိုက်ခိုက်မှုကို မြင်းမူမြို့ပြတော်လှန်ရေးအဖွဲ့ (MCRF)၊ မြောင်မြို့နယ် ပြည်သူ့ကာကွယ်ရေးနဲ့ လုံခြုံရေးအဖွဲ့ (CDSOM)၊ စစ်ကိုင်းခရိုင် ပလဖ၊ ဆင်ရိုင်းစစ်ကြောင်း(မြောင်)၊ ကျေးရွာတပ်ပေါင်းစု၊ စစ်ကိုင်းခရိုင်တပ်ရင်း ၁၊ စစ်ကိုင်းခရိုင်တပ်ရင်း ၂၊ စစ်ကိုင်းခရိုင်တပ်ရင်း ၄၊ မြောင်တိုက်နယ် ၆ ပကဖ၊ မြောင်မြို့နယ်ပြည်သူ့လုံခြုံရေးအဖွဲ့၊ Wolf Brother၊ ကျောက်ဆည်နဂါးနီ၊ Liberation Army of Central Region၊ 8 Stars၊ Taloke PDF၊ ဒေါင်းစစ်သည်၊ Myaung Union Army၊ ဝရဇိန်ထုတ်လုပ်ရေး၊ ဒေါင်းညီနောင် တို့နဲ့အတူ မြင်းခြံမြို့နယ် ပကဖ တို့ ပူးပေါင်းတိုက်ခိုက်ခဲ့ကြတာလို့လည်း သိရပါတယ်။