ထိုင်းနိုင်ငံမှာ ကျားဖြန့်ငွေလိမ်ဂိုဏ်းနှိမ်နင်းရေးကို အရှိန်အဟုန်မြှင့် ဆောင်ရွက်နေရာမှာ ငွေလိမ်ဂိုဏ်းရဲ့ လုပ်ငန်းစဉ်ထဲမှာ အမည်ခံဘဏ်စာရင်းအတုတွေ သုံးပြီး ငွေလွှဲယူနေတာလည်း ပါဝင်ပါတယ်။

ဒီပြဿနာကို ပြတ်ပြတ်သားသား ဖြေရှင်းဖို့အတွက် ထိုင်းနိုင်ငံဘဏ် Bank of Thailand ၊ အဂတိလာဘ်စားမှုတိုက်ဖျက်ရေးအဖွဲ့နဲ့ နည်းပညာရာဇဝတ်နှိမ်နင်းရေးစင်တာတို့ ပူးပေါင်းပြီး ဘဏ်လုံခြုံရေးဆိုင်ရာ အရေးပေါ်နည်းဥပဒ ပြဋ္ဌာန်းဆောင်ရွက်နေတယ်လို့ TNN ထိုင်းသတင်းမှာ ဖော်ပြပါတယ်။

ဒီနှစ် ဖေဖော်ဝါရီလဆန်းက စတင်သက်ဝင်တဲ့ အဆိုပါဥပဒေထဲမှာ ဘဏ်ငွေစုစာရင်း စာအုပ်ဖွင့်ထားသူရဲ့  အမည် ၊ ဖုံးနံပါတ်နဲ့ ငွေစီမံမှုအပလီ‌ကေးရှင်း ထည့်သွင်းထားတဲ့ ဖုံးနံပါတ်ဟာ တခုတည်းဖြစ်ရမယ်၊ မသမာမှုနဲ့ ပတ်သက်တယ်လို့ သံသယရှိတဲ့ ဘဏ်စာရင်းထဲကို ငွေလွှဲပေးမည်မဟုတ်၊ မိမိအမည်ပေါက် ဘဏ်ငွေစုစာရင်းဟာ သံသယစာရင်းထဲ ပါဝင်နေရင် ဘဏ်ကနေ အကြောင်းကြားလာမှာဖြစ်ပြီး ကာယကံရှင်ကိုယ်တိုင် အထောက်အထားတွေနဲ့အတူ ဘဏ်မှာသွားရောက်ဖြေရှင်းဖို့၊ အွန်လိုင်းလိမ်လည်မှုမှ ရှောင်ရှားရေး မက်ဆေ့ချ်ထဲ လင့်ခ်တွေ ပို့ပေးမှုတွေ ကန့်သတ်ဖို့ စတဲ့အချက်တွေ ပါဝင်တယ်လို့ ထိုင်းနိုင်ငံဘဏ်က ထုတ်ပြန်ထားတယ်လို့ ဆိုပါတယ်။

ဥပ‌ဒနဲ့မညီညွတ်တဲ့ အမည်ခံဘဏ်စာရင်းအတုမှာ အကြမ်းဖျင်းအားဖြင့် အဆင့် ၃ ဆင့် ခွဲထားတယ်၊ အဆင့် ၁ အနက်ရောင်မြင်းစာရင်းမှာ အမည်ခံဘဏ်ငွေစုစာရင်းဖြစ်ကြောင်း သက်ဆိုင်ရာက စုံစမ်းစစ်ဆေးပြီးစီးသူ၊ အဆင့် ၂ က  မီးခိုးရောင်မြင်းစာရင်းမှာ အမည်ခံစာရင်းဖြစ်ကြောင်း တိုင်တန်းခံထားရပြီး သက်ဆိုင်ရာမှ စုံစမ်းစစ်ဆေးဆဲနဲ့အဆင့် ၃ အညိုရောင်မြင်းမှာ အမည်ခံစာရင်းလို့ ဘဏ်ဝန်ထမ်းတွေက သံသယရှိသူတွေဖြစ်တယ်လို့ ဆိုပါတယ်။

၂၀၂၄ ခုနှစ် ဒီဇင်ဘာလကစပြီး သက်ဆိုင်ရာက ဖျက်သိမ်းခဲ့တဲ့ အမည်ခံ ဘဏ်ငွေစုစာရင်း ၁ ဒသမ  ၆၆ သန်းရှိတယ်၊ အဲဒီထဲမှာ လာဘ်စားမှုတိုက်ဖျက်ရေးရဲတပ်ဖွဲ့က စစ်ဆေးတွေ့ရှိတာ ၆၃၀,၅၃၇ ခု၊ ဘဏ်အသီးသီးက တွေ့ရှိတာ ၅၈၀,၆၃၇ ခု၊ AOC (Anti Online Scan Operation Center) က စစ်‌ဆေးတွေ့ရှိတာ ၄၅၅,၂၄၁ ခု ရှိတယ်။ အဆိုပါအမည်ခံစာရင်းတွေနဲ့ ပတ်သက်သူပေါင်း ၂,၄၉၅ ယောက်ကို အရေးယူခဲ့တယ်လို့ ထိုင်းသတင်းမှာ ဖော်ပြပါတယ်။

အဂတိလာဘ်စားမှုတိုက်ဖျက်ရေးတပ်ဖွဲ့ အထွေထွေအတွင်းရေးမှူး ရဲမှူးကြီး ဧကထနတ် လိုမ့်ဆုန်ကတ်က သူတို့အဖွဲ့အစည်းအနေနဲ့ ပြီးခဲ့တဲ့ ၂၀၂၃ မတ်လကစ အမည်ခံဖွင့်ထားတဲ့ ငွေစာရင်းပေါင်း ၆၅၀,၀၀၀ ကျော် ဖျက်သိမ်းခဲ့တယ်၊ တချို့တွေဟာ လူတယောက်ကို ဘဏ်စာရင်းစာအုပ်ပေါင်း ၅၀ မှ ၄၀၀ ထိ ဖွင့်ထားတာတွေ့ရှိတယ်၊  အဲဒီထဲက ပိုင်ရှင်က လာပြီးမထုတ်ယူရဲတဲ့ ငွေဘတ်သန်းပေါင်း ၂,၀၀၀ ကျော် ဘဏ်ထဲမှာ ရှိနေသေးတယ်လို့ သတင်းစာရှင်းပွဲမှာ ပြောပါတယ်။

ထိုင်းဥပ‌ဒေအရ အမည်ခံဘဏ်စာရင်းဖွင့်ပေးသူမှာ ထောင်ဒဏ် ၃ နှစ်ထက် မပို ဒါမှမဟုတ် ငွေဒဏ် ၃ သိန်းထက်မပို ဒါမှမဟုတ် ထောင်ဒဏ်ရော ငွေဒဏ်နှစ်ရပ်လုံး ကျခံရနိုင်တယ်။ အဆိုပါဘဏ်စာရင်းဟာ မသမာတဲ့လုပ်ငန်းမှာ အသုံးချတာတွေ့ရှိပါက ငွေစာရင်းပိုင်ရှင်မှာ မသမာတဲ့လုပ်ငန်းမှာ ပူးပေါင်းပါဝင်မှုနဲ့ အရေးယူခံရမှာဖြစ်ပြီး နစ်နာသူတွေအနေနဲ့လည်း အဆိုပါ ဘဏ်စာရင်းပိုင်ရှင်ကို တရားမမှုနဲ့ တရားစွဲကာ နစ်နာကြေးတွေ တောင်းခံခွင့်ရှိတယ်လို့ ဆိုပါတယ်။

၂၀၂၄ ခုနှစ် ချူလာလောင်ကွန်တက္ကသိုလ် စစ်တမ်းအရ ထိုင်းနိုင်ငံသား ၃၆ သန်းဟာ  အွန်လိုင်းလိမ်လည်မှုတွေမှာ ပစ်မှတ်ထားခံရပြီး အဲဒီထဲက ထက်ဝက်လောက်က သားကောင်ဖြစ်ခဲ့ရတယ်လို့ သနေရှင်းသတင်းမှာ ဖော်ပြပါတယ်။

ကိုးကား - TNN News / The Nation / One News