စစ်ကိုင်းတိုင်း၊ ဘိုမြို့နယ်အရှေ့တောင်ခြမ်း ဝက်လက်မြို့နယ်အစပ်မှာရှိတဲ့ ကံကြီးတောရွာကို စစ်တပ်က ဖေဖော်ဝါရီ ၉ ရက်‌‌ နေ့လယ် ၂ နာရီခွဲလောက်မှာ လေကြောင်းကနေ  ဗုံကြဲပြီး လက်နက်ကြီးနဲ့ ပစ်ခတ်ခဲ့လို့ ရွာသား ၂ ယောက် ထိခိုက်ဒဏ်ရာရသွားတယ်လို့ ဒေသခံတွေက ပြောပါတယ်။

ကံကြီးတောရွာနေ ပြည်သူတယောက်က “စစ်တပ်က ရွှေဘိုမြို့အမှတ် ၈  လေ့ကျင့်ရေးတပ်က ဟောင်ဝှစ်ဇာနဲ့ အရင်ပစ်ခတ်တာဗျ။ အဲတာပြီး‌တော့ လေယာဉ်နဲ့ ဗုံးသီး ၂ လုံးချတယ်။ ဟောင်ဝှစ်ဇာနဲ့ ပစ်တာကတော့ ထိခိုက်မှုမရှိဘူး။ လေယာဉ်နဲ့ ဗုံးကြဲပြီး စက်လက်နက်ပစ်တာက ပြည်သူ ၂ ဦး ထိခိုက်တယ်ဗျ” လို့ ပြောပါတယ်။

ပစ်ခတ်မှုကြောင့် အသက် ၅၅ နှစ်အရွယ် ရွာသား ဦးလှဖော် ခြေထောက် ပြတ်ထွက် ပြင်းထန်ဒဏ်ရာရရှိခဲ့ပြီး အသက် ၄၀ နှစ်အရွယ် ဒေါ်ဖြူကတော့ မျက်နှာ ပေါက်ပြဲဒဏ်ရာရရှိခဲ့ကာ လူနေအိမ်တွေလည်း ပျက်စီးခဲ့တယ်ပါတယ်။

ဒေသခံပြည်သူ့ကာကွယ်ရေးတပ်ခေါင်းဆောင်တယောက်က “ကျနော်တို့ သိထားတာက ဂျက်ဖိုက်တာနဲ့ Rocket ၂ လုံးနဲ့ ပစ်တယ်။ လေယာဉ်ပေါ်ကနေ စက်လက်နက်ပစ်ခတ်သွားတယ်။ ဒဏ်ရာရတဲ့သူ ၂ ဦးထဲက တဦးကတော့ ဒဏ်ရာပြင်းထန်ပြီး ခြေ‌ထောက်ဖြတ်ရမယ်လို့ သိထားရတယ်ဗျ။ ဘာလို့ အခုလိုပစ်တာလဲဆိုတာကတော့ မြေပြင်မှာ ဘာတိုက်ပွဲမှမရှိဘဲ အကြောင်းမဲ့ပစ်သွားတာလို့ ပြောပါတယ်။

ကံကြီး တောရွာဟာ ရွှေဘိုမြို့နဲ့ ၆ မိုင်နီးပါးကွာဝေးပြီး အိမ်ခြေ ၂၀၀ နီးပါးခန့်သာရှိတဲ့ ကျေးရွာတရွာဖြစ်ပါတယ်။

မန္တလေးတိုင်း၊ ငါန်းဇွန်မြို့နယ်မှာလည်း စစ်ကောင်စီတပ်က ဇန်နဝါရီ ၇ ရက်ည ၁၂ နာရီဝန်းကျင်မှာ စက်တပ်လေထီးနဲ့ ထပ်မံဗုံးကြဲတိုက်ခဲ့တာကြောင့် နေအိမ်နဲ့ အိမ်မွေးတိရစ္ဆာန်တချို့ ဒဏ်ရာရှိခဲ့ ပါတယ်။

ဘဏ္ဍာရှာဖွေရေးတာဝန်ခံ ကိုဟရုနာကာဂျီမာ က “ငါန်းဇွန်အနောက်ဘက်က ဧရာဝတီမြစ်ကမ်းဘေးမှာရှိတဲ့ ယိုးဒယားရွာသစ်ရွာကို ညသန်းခေါင်မှာ စက်တပ်လေထီး ၂ စီးနဲ့ ဗုံး ၄ လုံးကြဲသွားတာပါ။ အိမ် ၁ လုံးပျက်စီးပြီးတော့ ခိုင်းနွား ၂ ကောင် ဒဏ်ရာရပါတယ်။ ရွာခံတွေကနော့ အချိန်မှီပြေးပုန်းနိုင်ကြလို့ လူထိခိုက်တာတော့ မရှိပါဘူး” လို့ ပြောပါတယ်။

စစ်ကောင်စီတပ်ဟာ ငါန်းဇွန်မြို့နယ်ထဲက ကျေးရွာတွေကို စက်တပ်လေထီးအသုံးပြုပြီး  မကြာခဏ ဗုံးကြဲချနေတာကြောင့် ဒေသခံပြည်သူတွေ စိုးရိမ်ထိတ်လန့်နေကြရတယ်လို့လည်း ဆိုပါတယ်။

ငါန်းဇွန်မြို့နယ် ပြည်သူ့အုပ်ချုပ်ရေးအဖွဲ့ရဲ့​ပြောရေးဆိုခွင့်ရှိသူက “တိုက်ပွဲရှိတာမဟုတ်ဘဲ ကြဲသွားပြန်တာပါ။ ဒီမြို့နယ်ထဲက ရွာတွေတော်တော်များများက ရွာခံတွေက လေယာဥ်သံနဲ့ စက်တပ်လေထီးသံကြားရင်ကို အတော်လေးကြောက်နေကြတဲ့ အနေအထားဖြစ်နေတယ်။ ညပိုင်းတွေဆိုရင်လည်း ကောင်းကောင်း မအိပ်ကြရဘူး။ လေယာဥ်သံကြားရင် ထပြေးရတာ။ တောင်ယာလုပ်ငန်းတွေလည်း ကောင်းကောင်း မလုပ်နိုင်ကြတော့ဘူး။ တချို့ရွာတွေဆိုရင် ရွာလုံးကျွတ်လောက်ထွက်ပြေးနေကြရတာ လချီနေကြပြီ။ စားဝတ်နေရေးတွေလည်း ခက်ခဲကြတာပေါ့ဗျာ” လို့  ပြောပါတယ်။

စစ်ကောင်စီတပ်ဟာ ဖေဖော်ဝါရီ ၆ ရက် မနက် ၂ နာရီခွဲဝန်းကျင်ကလည်း ငါန်းဇွန်မြို့နယ်ထဲက ကန်သာကျေးရွာ ဘုန်းကြီးကျောင်းပေါ်ကို စက်တပ်လေထီးနဲ့ဗုံးကြဲချခဲ့လို့ ဆရာတော် တပါး ပျံလွန်တော်မူပြီး အမျိုးသား တယောက် ထိခိုက်ဒဏ်ရာရရှိခဲ့သလို ကျောင်းဆောင် တဆောင်လည်း ထိခိုက်ပျက်စီးခဲ့ပါသေးတယ်။

ငါန်းဇွန်မြို့နယ်ထဲကို စစ်ကောင်စီတပ်က လေကြောင်းတိုက်ခိုက်မှုတွေ​ မကြာခဏပြုလုပ်နေတာကြောင့်  ၂၀၂၄ ခုနှစ်၊ ဩဂုတ်လကနေ အခု ၂၀၂၅  ဇန်နဝါရီအထိ ၅ လအတွင်း ရဟန်းသံဃာတော်တွေ၊ ကလေးသူငယ်တွေအပါအဝင် တော်လှန်ရေးရဲဘော်တွေနဲ့ ဒေသခံပြည်သူ အယောက် ၃၀ နီးပါး သေဆုံးခဲ့ရတယ်လို့လည်း ငါန်းဇွန်မြို့နယ် ပြည်သူ့အုပ်ချုပ်ရေးအဖွဲ့ ဆီကနေ သိရပါတယ်။