ပြည်နယ်နဲ့တိုင်းအသီးသီးမှာရောက်နေတဲ့ စစ်ဘေးရှောင်တွေအနေနဲ့ အုပ်ချုပ်ရေးအဖွဲ့ကို အကြောင်းကြားမှ ထောက်ပံ့ငွေပေးသွားမယ်လို့ စီမံကိန်းနှင့်ဘဏ္ဍာရေးဝန်ကြီး ဦးဝင်းရှိန်က ပြောပါတယ်။
နေပြည်တော် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနမှာ ဖေဖော်ဝါရီ ၄ ရက်က ပြုလုပ်ခဲ့တဲ့ အစည်းအဝေးမှာ ပြောဆိုခဲ့တာပါ။
လက်နက်ကိုင်ပဋိပက္ခတွေကြောင့် နေရပ်စွန့်ခွာလာရတဲ့ Non CDM ဝန်ထမ်းတွေနဲ့ အရပ်သားပြည်သူတွေကို အမျိုးသားသဘာဘေးအန္တရာယ်ဆိုင်ရာ စီမံခန့်ခွဲမှုရန်ပုံငွေက ထောက်ပံ့သွားမှာဖြစ်ပြီး စစ်ဘေးရှောင်တွေအနေနဲ့ အုပ်ချုပ်ရေးပိုင်းကို အကြောင်းကြားရမယ်လို့ ပြောဆိုခဲ့တာပါ။
“တိုက်ပွဲဖြစ်လို့ စစ်ရှောင်လာတာတောင် စစ်ရှောင်လာတဲ့နေရာက ထောက်ခံစာတောင်းတယ်၊ မပါရင် ၃ သောင်းပေးရတယ်။ စာရင်း ခဏခဏကောက်တယ်၊ ထောက်ပံ့ကြေးပေးဖို့မဟုတ်ဘူး ရန်ကုန်မှာ တခုခုဖြစ်ရင် စစ်ဆေးမေးမြန်းဖို့။”
တိုက်ပွဲဖြစ်ရာ အမ်းကနေ ဂွကိုစစ်ရှောင်လာပြီး ဂွမြို့မှာ တိုက်ပွဲထပ်ဖြစ်လို့ ဧရာဝတီတိုင်း ပုသိမ် မြို့ကို စစ်ရှောင်လာတဲ့ Non CDM ဝန်ထမ်းတယောက်ကလည်း အုပ်ချုပ်ရေးက စာရင်းကောက်ပြီး ဘာမှမလုပ်ပေးဘူးလို့ DVB ကို ပြောပါတယ်။
“စစ်ရှောင်တဦးကို ထောက်ပံ့ငွေ ၅ သောင်းပေးတယ်လို့ ရှမ်းမြောက်ကလူတွေပြောတယ်။ ဘယ်လိုပုံစံမျိုးနဲ့ပေးလဲတော့ မသိဘူး။ ၅ သောင်းရဖို့ ဖြည့်ရတဲ့စာရွက်စာတမ်းတွေ ဖြေလိုက်ရတဲ့ မေးခွန်းအများကြီးပဲလို့ ပြောတယ်။ ပုသိမ်မှာလည်း စာရင်းကောက်တယ် ဘယ်တော့ ပေးမလဲတော့မသိဘူး။”
မြန်မာနိုင်ငံတဝန်းက စစ်ဘေးရှောင်တွေကို ထောက်ပံ့ငွေပေးမယ်လို့ ကိုးကန့်တပ် MNDAA နဲ့ စစ်ကောင်စီတပ်ကြား အပစ်အခတ်ရပ်စဲရေး လက်မှတ်ထိုးတဲ့နေ့ ဇန်နဝါရီ ၂၀ ရက်မှာ စစ်တပ်ဘက်က ထုတ်ပြန်ကြေညာခဲ့တာပါ။
