မန္တလေး၊ အမရပူရမြို့နယ်၊ မှန်တန်းရပ်ကွက်မှာ ဇန်နဝါရီ ၁၇ ရက် မနက် ၁၀ နာရီ ၁၀ မိနစ်လောက်က မီးလောင်ခဲ့တာကြောင့် အိမ် ၃ လုံး ပျက်စီးပြီး လူ ၃ ယောက် ဒဏ်ရာရခဲ့တယ်လို့ ကယ်ဆယ်ရေးအဖွဲ့တွေက ပြောပါတယ်။
ရပ်ကွက်နေသူတွေရဲ့ ပြောပြချက်အရ သွပ်မိုး၊ ပျဉ်ကာ လူနေ ၂ ထပ်အိမ်မှာ ဂက်စ်နဲ့ ဟင်းချက်ရာက မီးလောင်မှု စတင်ခဲ့တာလို့ သိရပြီး မီးလောင်မှုအတွင်း ၂ ထပ်အိမ် ၃ လုံး ပျက်စီးသွားခဲ့တာပါ။
ကယ်ဆယ်ရေးအဖွဲ့ဝင်တယောက်က “ကျနော်တို့ဆီ ဒဏ်ရာရပြီးရောက်လာတာ အမျိုးသား ၃ ဦး ရှိပါတယ်။ ၂ ထပ်အိမ် ၃ လုံးမှာ အရှေ့ကပ်ရက်က ၂ လုံး၊ အနောက်မှာ ၁ လုံး” လို့ ပြောပါတယ်။
မီးလောင်မှုအတွင်း အသက် ၃၀ အရွယ် အမျိုးသား ၂ ယောက်မှာ မျက်နှာမီးဟပ်၊ ပြတ်ရှဒဏ်ရာ ရရှိပြီး အသက် ၂၅နှစ်အရွယ် မီးသတ်အဖွဲ့ဝင် ၁ ဦးမှာ အသက်ရှုကြပ် မီးဟပ်ဒဏ်ရာတွေ ရရှိခဲ့လို့ အရပ်ဘက်ကယ်ဆယ်ရေးအဖွဲ့တွေက မြေပြင်ကုသမှုပေးခဲ့ကြပါတယ်။
အမရပူရမြို့နယ်မီးသတ်မှ မီးသတ်ယာဉ် ၁၀စီး၊ ရေသယ်ယာဉ် ၅ စီးနဲ့လာရောက်ငြှိမ်းသတ်ခဲ့တာကြောင့် မနက် ၁၀နာရီ ၂၆ မိနစ်မှာ မီးထိန်း၊ ၁၀နာရီခွဲမှာ မီးငြိမ်းသွားပါတယ်။
မန္တလေးမှာ ပြီးခဲ့တဲ့ ဇန်နဝါရီလ ၁၄ ရက် နေ့ခင်း ၁၂နာရီ ၅၅ မိနစ်ကလည်း ပြည်ကြီးတံခွန်မြို့နယ်၊ (၁၃၈x၇၀)လမ်းထောင့်၊(ဈ)ရပ်ကွက်က ချည်မျှင်စက်ရုံမီးလောင်ခဲ့ပါသေးတယ်။
