အင်္ဂလန် အက်ဖ်အေဖလား စတုတ္ထအဆင့်ပွဲစဉ်တွေ မဲခွဲပွဲကို မနေ့ညက ပြုလုပ်ခဲ့ရာမှာ မန်ယူအသင်းက အသင်းနည်းပြဟောင်း နစ္စတယ်ရွိင်း တာဝန်ယူနေတဲ့ လက်စတာနဲ့ ထိပ်တိုက်တွေ့ဆုံနေပါတယ်။
တတိယအဆင့်မှာ အာဆင်နယ်ကို ပင်နယ်တီအဆုံးအဖြတ်မှာ ၅ ဂိုး ၃ ဂိုးနဲ့ အနိုင်ရပြီး နောက်တဆင့်တက်ခဲ့တဲ့ မန်ယူအသင်းဟာ စတုတ္ထအဆင့်မှာတော့ အိမ်ကွင်းပွဲစဉ်အဖြစ် လက်စတာနဲ့ ယှဉ်ပြိုင်သွားရမှာပါ။
၃၂ သင်းပါဝင်တဲ့ စတုတ္ထအဆင့်မှာ ပရီးမီးယားလိဂ်အသင်းချင်း တွေ့ဆုံမှုအနေနဲ့ ချဲလ်ဆီးနဲ့ ဘရိုက်တန်၊ အဲဗာတန်နဲ့ ဘုန်းမောက်၊ အက်စတွန်ဗီလာနဲ့ စပါးအသင်းတို့ ထိပ်တွေ့ဆုံပါတယ်။
တခြားအသင်းကြီးတွေထဲမှာ မန်စီးတီးက လေတန်နဲ့ ဒါဘီပွဲစဉ်က အနိုင်ရတဲ့အသင်းနဲ့ အဝေးကွင်းပွဲ ကစားရမှာဖြစ်ပြီး လီဗာပူးက ပလိုင်းမောက်အသင်းနဲ့ အဝေးကွင်းမှာ ယှဉ်ပြိုင်သွားရမှာ ဖြစ်ပါတယ်။
စတုတ္ထအဆင့်ပွဲစဉ်တွေကို လာမယ့် ဖေဖော်ဝါရီ ၇ ရက်ကနေ ၁၀ ရက်အတွင်း ယှဉ်ပြိုင်သွားကြမှာ ဖြစ်ပါတယ်။
