ချင်းပြည်နယ်၊ ဖလမ်းမြို့သိမ်းစစ်ဆင်ရေးအတွင်းမှာ တိုက်ပွဲတွေ ဆက်လက်ဖြစ်ပွားနေပြီး ဖလမ်းမြို့ရှောင်ကွင်းလမ်းတွေကနေ သွားလာမှုကို ပိတ်ပင်ထားတယ်လို့ ဒေသခံတွေက ပြောပါတယ်။

ဇန်နဝါရီ ၇ ရက် မနက်ပိုင်းမှာ ဖလမ်း ခလရ ၂၆၈ တပ်ရင်းကို ချင်းညီနောင်တပ်ဖွဲ့တွေက ထပ်မံ ထိုးစစ်ဆင် တိုက်ခိုက်နေပြီး တိုက်ပွဲတွေ ဆက်လက်ဖြစ်ပွားနေတာပါ။

တိုက်ပွဲပြင်းထန်နေပြီး လေကြောင်းတိုက်ခိုက်မှု ဆက်တိုက်ပြုလုပ်နေတဲ့အတွက် ဖလမ်းမြို့ကနေ ကလေး၊ ဝေဘူလ၊ ရိဒ်၊ ဟားခါး စတဲ့မြို့တွေကို ဆက်သွယ်ထားတဲ့လမ်းတွေ အားလုံးကို ပိတ်ပင်ထားတယ်လို့ သိရပါတယ်။

CNDF ပြောရေးဆိုခွင့်ရှိသူ ဆလိုင်းတင်မီက “မနေ့မနက် ၅ နာရီလောက်ကနေ ၂၆၈ ကို ထိုးစစ်ဆင်နေပါတယ်။ အထဲကိုတော့ ထိုးဖောက်လို့ မရသေးပါဘူး။ သူတို့ဘက်ကလည်း ဂျက်ဖိုက်တာ ၅ စီးနဲ့ တနေကုန်ပဲ လာပစ်တယ်။ Y 12 နဲ့လည်း အလုံး ၁၀၀ ‌‌ကျော်လောက် ချတယ်။ စစ်ဆင်ရေးစကတည်းက လမ်းတွေကိုတော့ ယာယီပိတ်ထားပါတယ်။ လုံခြုံ‌ရေးကြောင့်ရော လေယာဉ်တွေကလည်း ဆက်တိုက်ပစ်နေတော့ မလိုလားအပ်တာတွေ မဖြစ်အောင် ပိတ်ရတာပါ” လို့ ပြောပါတယ်။

ပြီးခဲ့တဲ့ ၂၀၂၄ ခုနှစ် နိုဝင်ဘာ ၉ ရက်က စတင်ကာ ချင်းညီနောင် စစ်ဆင်ရေးအဖြစ် ဖလမ်းမြို့သိမ်းတိုက်ပွဲ ဆင်နွှဲနေကာ ဖလမ်းမြို့က စစ်ကောင်စီစခန်းအားလုံးကို သိမ်းယူထားပြီး ခလရ ၂၆၈ တပ်ရင်းတခုသာ သိမ်းယူဖို့ ကျန်ရှိတော့တယ်လို့ သိရပါတယ်။

ပြီးခဲ့တဲ့ ဇန်နဝါရီ ၄ ရက်ကလည်း ဖလမ်းမြို့သိမ်းတိုက်ပွဲအတွင်း ဖမ်းမိထားတဲ့ စစ်သုံ့ပန်းတွေ ထားရှိတဲ့ ခွန်လုံရွာကို စစ်ကောင်စီက လေကြောင်းတိုက်ခိုက်ခဲ့တဲ့အတွက် စစ်သုံ့ပန်း ၇ ယောက် သေဆုံးခဲ့ပါတယ်။