မန္တလေးတိုင်း၊ ညောင်ဦးမြို့နယ်မှာ စစ်ကောင်စီလက်အောက်ခံ ရဲတပ်ဖွဲ့ဝင်တယောက်ဟာ လက်နက်ခဲယမ်းတွေနဲ့ အလင်းဝင်ရောက်လာတယ်လို့ Southern YSO PDF က ဇန်နဝါရီ ၇ ရက်မှာ သတင်းထုတ်ပြန်ပါတယ်။

Southern YSO PDF ရဲ့ ပြန်ကြားရေးတပ်ဖွဲ့ဝင်က “သူက ညောင်ဦးနဲ့ ပခုက္ကူမှာ တလှည့်စီ တာဝန်ကျနေရင်းနဲ့ အခု အလင်းဝင်တဲ့အချိန်က ညောင်ဦး ခုတင် ၁၀၀ ဆေးရုံမှာ တာဝန်ကျနေတဲ့အချိန် ကျနော်တို့ဆီကို အလင်းဝင်ဖို့ ဆက်သွယ်လာခဲ့တာပါ” လို့ ပြောပါတယ်။

အလင်းဝင်ရောက်လာသူဟာ မိတ္ထီလာ၊ ရဲတပ်ရင်း ၃၅ က အသက် ၁၉ နှစ်အရွယ် ရဲတပ်သား နေသူအောင် (ကိုယ်ပိုင်အမှတ် တ/၃၀၄၄၀၉) ဖြစ်တယ်လို့ ဆိုပါတယ်။

Southern YSO PDF တာဝန်ခံ ကိုအောင်မောင်းက “လွတ်လပ်ရေးနေ့မှာ အထိမ်းအမှတ်ဖြစ်အောင် အလင်းဝင်ချင်တယ်ဆိုလို့ သူရှိတဲ့နေရာကို သွားခေါ်ခဲ့ရတယ်။ ညောင်ဦးဘက်မှာ တာဝန်ကျနေတာ ၃ လလောက် ရှိပြီတဲ့။ ပြည်သူ့အပေါ်မှာ ယုတ်မာရိုင်းစိုင်းတဲ့ အလုပ်တွေ မလုပ်ချင်တော့လို့ အလင်းဝင်တာလို့ သိရတယ်ဗျ။ လက်နက်ခဲယမ်းတွေနဲ့အတူ အလင်းဝင်လာတဲ့အတွက်လည်း သိန်း ၄၀ ချီးမြှင့်ပေးလိုက်ပြီး သူနေထိုင်ချင်တဲ့နေရာကို ပို့ပေးထားပြီးပါပြီ” လို့ DVB ကို ပြောပါတယ်။

ရဲတပ်သား နေသူအောင်ဟာ ပါးရီစက်ကလေး သေနတ်အမျိုးအစား (ခေါ် ) 81 သေနတ်တလက်၊ ကျည်ဘောက် ၂ ခု၊ 7.62 ကျည် အတောင့် ၅၀ တို့နဲ့အတူ အလင်းဝင်ရောက်လာခဲ့တာဖြစ်ပြီး စစ်တပ်က အာဏာသိမ်းပြီးနောက် ၂၀၂၅ ခုနှစ်၊ ဇန်နဝါရီ ၇ ရက်အထိ Southern YSO PDF အဖွဲ့ဆီကို အလင်းဝင်ရောက်လာကြတဲ့ စစ်ကောင်စီတပ်ဖွဲ့ဝင်နဲ့ ရဲတပ်ဖွဲ့ဝင် ၂၀ ကျော် ရှိနေပြီလို့လည်း သူက ဆက်ပြောပါတယ်။

အာဏာရှင်လက်အောက်မှာ တာဝန်ထမ်းဆောင်နေကြတဲ့ ရဲဘော်ညီအစ်ကိုများအနေနဲ့ အာဏာရှင်မျိုးဆက်၊ အာဏာရှင်ခိုင်းဖတ် အဖြစ်မခံကြဘဲ ပြည်သူ့ရင်ခွင်ကို အမြန်ဆုံးခိုလူံကြဖို့ တိုက်တွန်းထားတယ်လို့လည်း Southern YSO PDF ဆီကနေ သိရပါတယ်။