ရန်ကုန်၊ ရွှေပြည်သာမြို့နယ်၊ ၅ ရပ်ကွက်၊ သီရိမင်္ဂလာပတ်လမ်းမှာ ဇန်နဝါရီ ၇ ရက် ဒီမနက် ၄ နာရီ မိနစ် ၅၀ လောက်က မီးလောင်ခဲ့ပြီး အမျိုးသမီးတယောက် သေဆုံးခဲ့တယ်လို့ မြို့ခံလူမှုကူညီရေးအဖွဲ့ဝင်တွေက ပြောပါတယ်။
မီးလောင်မှုကြောင့် အုတ်၊ သစ်သား တထပ်အဆောက်အဦ အဆောင် ၃ လုံးက အခန်းပေါင်း ၄၀ နဲ့ အိမ်တွင်းပစ္စည်းတွေ အကုန်လုံး ပျက်စီးသွားပါတယ်။
ကယ်ဆယ်ရေးအဖွဲ့ဝင်တယောက်က “အဆောင် ၃ ခု၊ အခန်းပေါင်း ၄၀၊ သေဆုံးက အသက် ၃၅ အမျိုးသမီး၊ ခွေးတကောင်ပါ သေတယ်။ ဟင်းချက်ရင်း လောင်တာ” လို့ ပြောပါတယ်။
လျှပ်စစ်မီးလာတဲ့အချိန် ဒယ်နီအိုးနဲ့ ဟင်းချက်ရာက ဝါယာရှော့ဖြစ် လောင်ကျွမ်းခဲ့တာဖြစ်ပြီး အိပ်ပျော်နေတဲ့ အသက် ၃၅ နှစ်အရွယ် အမျိုးသမီးတယောက် မီးလောင်သေဆုံးသွားပါတယ်။
မီးလောင်မှုကို မီးသတ်နဲ့ အရပ်ဘက်အသင်းတို့က Level 1 မီးသတ်ယာဉ်အုပ်စုတွေနဲ့ ငြှိမ်းသတ်ခဲ့သလို ကယ်ဆယ်ရေးနဲ့ အရပ်သားတချို့ မီးဟပ်ဒဏ်ရာတွေ ရရှိခဲ့ပါသေးတယ်။
မီးလောင်မှုအပြီး ၁ နာရီခွဲလောက်အကြာမှ မီးငြိမ်းသွားပြီး သေဆုံးရုပ်အလောင်းကို လူမှုကူညီရေးယာဉ်နဲ့ ရွှေပြည်သာဆေးရုံ ပို့ဆောင်ပေးထားပါတယ်။
