ရခိုင်ပြည်နယ်၊ ပုဏ္ဏားကျွန်းမြို့နယ်၊ အောင်ဒုံပြင်နဲ့ တောင်ပေါက်ကျေးရွာအနီးကို စစ်ကောင်စီက ဇန်နဝါရီ ၅ ရက်မှာ လေကြောင်းတိုက်ခိုက်ခဲ့တာကြောင့် အရပ်သား ၄ ယောက် သေဆုံးပြီး တချို့ ထိခိုက်ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
စစ်ကောင်စီဟာ ဇန်နဝါရီ ၅ ရက် နေ့လယ် ၃ နာရီကျော်ခန့်မှာ ဂျက်တိုက်လေယာဥ် ၂ စီးနဲ့ အောင်ဒုံပြင်ကျေးရွာနဲ့ တောင်ပေါက်ကျေးရွာအနီးကို လေကြောင်းတိုက်ခိုက်ခဲ့တာဖြစ်ပြီး မွတ်ဆလင် အမျိုးသမီး ၂ ယောက် အပါအဝင် အရပ်သား ၄ ယောက် သေဆုံးခဲ့တာလို့ ပုဏ္ဏားကျွန်းဒေသခံတယောက်က ပြောပါတယ်။
“ညနေ ၃ နာရီဝန်းကျင်လောက်မှာ စစ်ကောင်စီက ဂျက်တိုက်လေယာဥ်နှစ်စီးနဲ့ ဗုံး ၃ ကြိမ် ကြဲသွားတာ။ တောင်ပေါက်အနီးမှာက ဖုန်းလိုင်းရတာကြောင့် ဖုန်းလိုင်းမရတဲ့ နေရာကသူတွေ ဖုန်းလာပြောကြတာ ရှိကြတယ်။ အဲဒီလူစုလူဝေးကို စစ်ကောင်စီက တမင်ရည်ရွယ်ပြီး ပစ်သွားတယ်။ တောင်ပေါက်အနီး ပစ်ခတ်မှုမှာ မွတ်ဆလင်အမျိုးသမီးနှစ်ဦးနဲ့ ကလေးတဦး သေသွားတယ်။ နောက် အောင်ဒုံပြင်ကျေးရွာကိုလည်း ဗုံးတလုံး ကြဲချသွားတယ်။ အောင်ဒုံပြင်မှာလည်း အမျိုးသမီးတဦး သေသွားတယ်။”
စစ်ကောင်စီရဲ့ လေကြောင်းတိုက်ခိုက်မှုကြောင့် သေဆုံးသွားသူမှာ ကျောက်တော်မြို့ ပိုက်သည်ရပ်(မွတ်ဆလင်)ရွာက အမျိုးသမီး ၂ ယောက်၊ အောင်ဒုံပြင်ရွာက မဇင်မာခိုင် (၁၇ နှစ်) နဲ့ ဆယ်ကျော်သက်အရွယ် ကလေးငယ်တယောက်တို့ ဖြစ်ကြပါတယ်။
ရခိုင်ပြည်နယ်မှာ စစ်ကောင်စီက ဖုန်းလိုင်းဖြတ်တောက်ထားတာကြောင့် စစ်ကောင်စီ ထိန်းချုပ်ထားဆဲ စစ်တွေမြို့နယ်က ဖုန်းလိုင်းတွေဟာ ပုဏ္ဏားကျွန်းမြို့နယ်အစပ် ကျေးရွာတွေမှာ ရရှိတာကြောင့် ဒေသခံတချို့ဟာ တောင်ပေါက်ကျေးရွာအနီးမှာ ဖုန်းလာပြောနေကြတာ ဖြစ်ပါတယ်။
ပုဏ္ဏားကျွန်းမြို့နယ် ယိုးတရုတ်ကျေးရွာကိုလည်း ဒီဇင်ဘာ ၃၁ ရက်က စစ်ကောင်စီက လေကြောင်းတိုက်ခိုက်ခဲ့တာကြောင့် ဒေသခံ ၅ ယောက် သေဆုံးပြီး ၉ ယောက် ထိခိုက်ဒဏ်ရာ ရရှိခဲ့ပါတယ်။
အာရက္ခတပ်တော် (AA) က စစ်ကောင်စီကို နိုင်ငံရေးနည်းလမ်းနဲ့ ဖြေရှင်းဖို့ ဖိတ်ခေါ်ပြီးနောက် စစ်ကောင်စီက ရခိုင်ပြည်နယ်က မြို့နယ်တွေကို လေကြောင်းတိုက်ခိုက်မှု ဆက်တိုက်ဆိုသလို ပြုလုပ်လာနေတာလည်း ဖြစ်ပါတယ်။
ရခိုင်တိုက်ပွဲ တနှစ်ကျော်အတွင်းမှာ AA က ပလက်ဝမြို့နယ် အပါအဝင် မြို့နယ် ၁၅ ခုကို သိမ်းပိုက်ထားပြီး စစ်ကောင်စီက AA ရဲ့ ထိန်းချုပ်နယ်မြေတွေကို ဆက်တိုက်ဆိုသလို ဗုံးကြဲတိုက်ခိုက်နေတာ ဖြစ်ပါတယ်။
