ချင်းပြည်နယ်၊ ဖလမ်းမြို့သိမ်းတိုက်ပွဲမှာ ဖမ်းမိထားတဲ့ စစ်သုံ့ပန်းတွေ ထိန်းသိမ်းထားတဲ့နေရာ ဗုံးကြဲခံရလို့ လူ ၈ ယောက် သေဆုံးခဲ့တယ်လို့ ချင်းအမျိုးသားကာကွယ်ရေးတပ် (CNDF) ကနေ သိရပါတယ်။

ဇန်နဝါရီ ၄ ရက် ည ၁၁ နာရီဝန်းကျင်မှာ ဖလမ်းမြို့နယ်၊ ခွန်းလုံရွာက စစ်သုံ့ပန်းတွေ ထိန်းသိမ်းထားတဲ့ နေရာကို စစ်ကောင်စီတပ်က ဂျက်ဖိုက်တာနဲ့ လေကြောင်းကနေ ဗုံးကြဲတိုက်ခိုက်ခဲ့တာပါ။

လေကြောင်းတိုက်ခိုက်ခံရမှုကြောင့် စစ်သုံ့ပန်း ၇ ယောက်နဲ့ စခန်းစောင့်တဲ့ CNDF တပ်ဖွဲ့ဝင် တယောက် သေဆုံးခဲ့တယ်လို့ CNDF ပြောရေးဆိုခွင့်ရှိသူက ပြောပါတယ်။

“စစ်ကောင်စီက လေကြောင်းကနေ ဗုံးကြဲတာပေါ့လေ၊ စစ်သုံ့ပန်းတွေကို ထိန်းသိမ်းတဲ့ ကျနော်တို့ CNDF က ရဲတယောက်ရယ်၊ စစ်သုံ့ပန်း ၇ ယောက်ရယ် ဆုံးပါတယ်။ စစ်သုံ့ပန်းထဲကပဲ ဒဏ်ရာရတဲ့သူလည်း ၄ ယောက်လောက် ရှိပါတယ်။ စစ်ကောင်စီတပ် အချင်းချင်းကြဲတဲ့ သဘောပါပဲ။”

နိုဝင်ဘာ ၁၂ ရက် ဖလမ်းမြို့သိမ်းတိုက်ပွဲအတွင်း ဖလမ်းမြို့ပေါ်ရှိ စစ်ကောင်စီ တပ်စခန်းတွေကနေ ဖမ်းဆီးမိထားတဲ့ စစ်သုံ့ပန်း ၄၅ ယောက်ထဲက လေကြောင်းတိုက်ခိုက်မှုကြောင့် ၇ ယောက် သေဆုံးသွားခဲ့တာပါ။

ဖလမ်းမြို့ကို ချင်းညီနောင်က ၂၀၂၄ ခုနှစ် နိုဝင်ဘာ ၉ ရက်ကတည်းကစတင်ကာ ချင်းညီနောင် အော်ပရေးရှင်းအဖြစ် မြို့သိမ်းတိုက်ပွဲ ဆင်နွှဲနေပြီး လက်ရှိအချိန်အထိ တိုက်ပွဲတွေ ဆက်လက်ဖြစ်ပွါးနေတာပါ။

မန္တလေးတိုင်း၊ တောင်သာမြို့နယ်မှာလည်း ရွှေစည်ကြီးကျေးရွာကို ဇန်နဝါရီ ၅ ရက် မနက် ၄ နာရီ ကျော်မှာ စစ်ကောင်စီတပ်က လေယာဉ်နဲ့ ဗုံးသီး ၁၂ လုံး ကြဲချတိုက်ခိုက်ခဲ့တာကြောင့် ပြည်သူတယောက် သေဆုံးခဲ့တယ်လို့ ဒေသခံထံက သိရပါတယ်။

ဒေသခံတယောက်က “လေယာဥ်ပုံစံကို တခါမှ မမြင်ဖူးပါဘူး။ အခုကြဲချခဲ့တာက နေရာ ၃‌ နေရာကို ဗုံးသီးက ၁၂ လုံး ကြဲချသွားတာ။ အဲလိုကြဲချလို့ ကျနော်တို့ အမဝမ်းကွဲ မမြင့်သန်း ၅၀ နှစ် ဦးခေါင်းကြေမွဒဏ်ရာနဲ့ ပွဲချင်းပြီး နေရာမှာ သေဆုံးရတယ်ဗျ၊၊ နောက်ပြီး အသက် ၁၂ နှစ်ခန့် ကလေးငယ်တဦးကတော့ မစိုးရိမ်ရ ဒဏ်ရာရရှိခဲ့တယ်ဗျ။ နွား ၂ ကောင်သေ၊ ၂ ကောင် ဒဏ်ရာရတယ်။ ကျန်တဲ့ ဗုံးသီးကြဲချတဲ့ နေရာ ၂ နေရာက‌တော့ ရွာရဲ့တောင်ဘက်က တောထဲကျသွားလို့ ပြည်သူထိခိုက်မှုမရှိခဲ့ဘူး” လို့ ပြောပါတယ်။

စစ်ကောင်စီက ဒီဇင်ဘာ ၃ ရက်နဲ့ ၄ ရက်နေ့တွေကလည်း မြင်းခြံမြို့ တပ်မ (၉၉) လက်အောက်ခံ ခမရ (၁၅) ကနေ  ဟောင်ဝစ်ဇာ လက်နက်ကြီးနဲ့ ပစ်ခတ်ခဲ့တာကြောင့် ဒေသခံပြည်သူတွေရဲ့ နေအိမ်တွေ ပျက်စီးမီးလောင်ခဲ့ပါတယ်။