ရန်ကုန်မြို့က မြို့နယ်တွေမှာ ၂၀၂၅ ခုနှစ်၊ ဇန်နဝါရီ ၅ ရက် ဒီနေ့ကစလို့ တရက်မှာ ၁၆ နာရီ မီးဖြတ်တော့မယ်လို့ ရန်ကုန်လျှပ်စစ်ဓာတ်အားပေးရေးအဖွဲ့ရဲ့ ကြေညာချက်အရ သိရပါတယ်။
အလှည့်ကျမီးပေးစနစ်အရ ဓာတ်အားပေးအုပ်စု ၃ ခု(A၊ B၊ C)ဆိုတဲ့ အုပ်စုတခုမှာ ၄ နာရီ မီးလာပြီးနောက် ၈ နာရီကြာ အလှည့်ကျမီးပြတ်တော့မှာပါ။
မြောက်ဥက္ကလာပမြို့ခံတယောက်က “တနေ့ကို ၄ နာရီ ၂ ခါပေးမှာလို့ပြောပေမဲ့ အခုတောင် သုနန္ဒာဘက်မှာ မီးဖြတ်ထားတယ်။ ဘာ ၄ နာရီမှ မလာဘူး။ ၂ ရက်ရှိနေပြီ။ ထမင်းတောင် ဝယ်စားနေရတယ်”လို့ ပြောပါတယ်။
မြောက်ဥက္ကလာလျှပ်စစ်ရုံးအဖွဲ့ကတော့ မြို့နယ်အတွင်းက ရပ်ကွက် ၅ ခုမှာ ကေဗွီ ၁၁ ရှိတဲ့ မြေအောက်ကြိုး ပြတ်တောက်သွားလို့ ပြုပြင်နေတာလို့ ဖြေဆိုပါတယ်။
မြန်မာနိုင်ငံမှာ လျှပ်စစ်ဓာတ်အားလိုအပ်ချက်ဟာ တနေ့ကို ၄,၄၀၀ မဂ္ဂါဝပ်ရှိနေပြီး လက်ရှိမှာ နေ့တိုင်း မဂ္ဂါဝပ် ၂,၄၀၀ ဝန်းကျင်ပဲ ထုတ်လုပ်နိုင်နေပါတယ်။
ပြီးခဲ့တဲ့ ၂၀၂၄ ဒီဇင်ဘာ ၃၁ ရက်နေ့က အမြင့်ဆုံးလျှပ်စစ်ဓာတ်အားထုတ်လုပ်မှု ၂၀၈၃ ဒသမ ၉ မဂ္ဂါဝပ် ရှိခဲ့ပေမယ့် အခု ဇန်နဝါရီ ၁ ရက်နေ့မှာ အမြင့်ဆုံးထုတ်လုပ်မှုက ၁၇၃၇ ဒသမ ၁ မဂ္ဂါဝပ်ပဲရှိခဲ့ပြီး တရက်အတွင်း ၃၄၆ မဂ္ဂါဝပ်အထိ ထိုးကျသွားတာ တွေ့ရပါတယ်။
လျှပ်စစ်ဓာတ်အားပေးတာနဲ့ပတ်သက်လို့ အချက်အလက်အမှန်မျှဝေပေးတဲ့ ကေအက်စ်(ခွဲမှူး) ရဲ့ ဖေ့စ်ဘွတ်ခ်လူမှုကွန်ယက်မှာတော့ Feeder Over Load၊ Tr Over Load ဖြစ်နိုင်လို့ ထရန်စဖော်မာ လောင်နိုင်တာကြောင့် မီးလာလာချင်း စုပြုံမသုံးဖို့ကို အကြံပြုထားပါတယ်။
