ရန်ကုန်တိုင်းအတွင်း မြို့နယ်တွေမှာ ၂၀၂၅ ဇန်နဝါရီ ၁ ရက်ကစလို့ လျှပ်စစ်မီး ပိုပြတ်တောက်လာပြီး အချိန်ဇယားအတိုင်း မဟုတ်တော့ဘဲ ပေးချင်သလို ပေးနေတယ်လို့ မြို့ခံတွေက ပြောပါတယ်။
၄ နာရီခြားတခါ လျှပ်စစ်မီးပေးဖို့ လုပ်ဆောင်ထားတဲ့ အပိုင်း A မနက် ၅ နာရီမှ ၉ နာရီ၊ အပိုင်း B နေ့လယ် ၁ နာရီမှ ညနေ ၅ နာရီ၊ အပိုင်း C ည ၉ နာရီမှ နောက်မနက် ၁ နာရီ အထိဟာ နှစ်အစပိုင်းမှာပဲ တနေ့လုံးပြတ်တောက်ပြီး ညပိုင်းမှာသာ ၂ နာရီလောက် မီးသုံးခွင့်ရရှိနေကြရပါတယ်။
စစ်ခေါင်းဆောင် မင်းအောင်လှိုင် ဒီဇင်ဘာလက ရန်ကုန်မြို့ရောက်ရှိချိန်မှာတော့ သူသွားဖို့ အစီအစဉ်ရှိတဲ့ မြို့နယ်တွေမှာသာ လျှပ်စစ်မီး ပုံမှန်ရခဲ့တာဖြစ်ပါတယ်။
လျှပ်စစ်မီး ပြတ်တောက်ချိန် ပိုများလာတာနဲ့ ပေးချင်တဲ့အချိန်မှ မီးပေးနေတာတွေကြောင့် လျှပ်စစ်အစားထိုး လောင်စာစရိတ်တွေ ပိုကုန်ကျလာတယ်လို့ မရမ်းကုန်းမြို့နယ်နေထိုင်သူတဦးက ပြောပါတယ်။
“မီးက လာတဲ့အချိန်က တနေ့ကို ၂ နာရီတောင် မရှိတော့ဘူး။ မရမ်းကုန်း ပိုဆိုးတယ်။ ထမင်းချက်ဖို့တောင် မီးသွေးပြန်သုံးနေရတယ်။ ဂက်စ်ကလည်း အသေးတဘူးကို ၁၇၀၀ လောက် ဖြစ်နေပြီ။ ပိုက်ဆံပိုကုန်တာပေါ့။ လာလိုက်ပျက်လိုက်နဲ့။ အခု ၁ နာရီလာမယ့် မီးက နာရီဝက် လောက်ပဲ လာသွားတယ်။ အခုကနေ ည ၉ နာရီအထိ တောက်လျှောက် ပျက်တော့မှာ။ မီးသာမလာတာလေ မီတာခတော့ ပုံမှန်အတိုင်း တက်နေတာပဲ။”
ရန်ကုန်လျှပ်စစ်ဓာတ်အားပေးပို့ရေးကော်ပိုရေးရှင်း YESC ထုတ်ပြန်ချက်မှာတော့ ၂၀၂၄ ဒီဇင်ဘာ ၃၁ ရက်က အမြင့်ဆုံးလျှပ်စစ်ဓာတ်အားထုတ်လုပ်မှု ၂၀၈၃ ဒသမ ၉ မဂ္ဂါဝပ် ရှိခဲ့ပေမဲ့ ဇန်နဝါရီ ၁ ရက်မှာ အမြင့်ဆုံးထုတ်လုပ်မှုက ၁၇၃၇ ဒသမ ၁ မဂ္ဂါဝပ်ဖြစ်ပွားကာ တရက်အတွင်း ၃၄၆ မဂ္ဂါဝပ်အထိ ထိုးကျသွားတာ တွေ့ရပါတယ်။
