တောင်ကိုရီးယားသမ္မတ ယွန်းဆော့ယောနေထိုင်ရာ အဆောက်အအုံကို ချီတက်ဆန္ဒပြသူတွေကို ရဲတွေက အင်အားသုံးတားဆီးခဲ့ပါတယ်။

ဆန္ဒပြသူတွေဟာ သမ္မတနေထိုင်ရာ နေရာကို ချီတက်ခဲ့ပေမဲ့ လမ်းမှာ ရဲတပ်ဖွဲ့က အင်အားသုံးပြီး တားဆီးခဲ့တာပါ။ 

သမ္မတယွန်းကို မနေ့က ဖမ်းဝရမ်းနဲ့ ဖမ်းဆီးဖို့ သွားခဲ့ပေမဲ့ သမ္မတအစောင့်တပ်ဖွဲတွေနဲ့ လုံခြုံရေးအဖွဲ့တွေက တားဆီးတာကြောင့် ဖမ်းဆီးဖို့ ကိစ္စမအောင်မြင်ခဲ့ပါဘူး။ 

ဒါ့ကြောင့် ဇန်နဝါရီ ၄ ရက်နေ့မှာ အလံတွေကိုင်ဆောင်ထားတဲ့ ဆန္ဒပြသူတွေက သမ္မတနေထိုင်ရာ အဆောက်အဦးကို စုဝေး ချီတက်ခဲ့တာဖြစ်ပါတယ်။  

ယွန်းဟာ ဒီဇင်ဘာ ၃ ရက်နေ့က စစ်အုပ်ချုပ်ရေးကြေညာခဲ့ပြီး ဆူပူအုံကြွမှုဖြစ် စေခဲ့တာနဲ့ပတ်သက်လို့ စုံစမ်းစစ်ဆေးမှု ခံယူရမှာဖြစ်ပါတယ်။ 

ဒါဟာ တောင်ကိုရီးယားမှာ တာဝန်ထမ်းဆောင်ဆဲ သမ္မတကို ပထမဆုံးအကြိမ် ဖမ်းဝရမ်းထုတ်ပြီး ဖမ်းဆီးဖို့ ကြိုးစားခဲ့တာလည်း ဖြစ်ပါတယ်။ 

“တားဆီးမှုတွေကြောင့် ဖမ်းဝရမ်းထုတ်ထားမှုက တဖြည်းဖြည်းနဲ့ ပျက်ပြယ်ဖွယ်ရှိပါတယ်” လို့ အဆင့်မြင့်အရာရှိများအတွက် အဂတိလိုက်စားမှု စုံစမ်းရေးရုံး CIO က ကြေညာချက်မှာ ဖော်ပြပါတယ်။ 

CIO ဟာ ဇန်နဝါရီ ၃ ရက် နေ့လယ် ၁း၃၀ မှာ ဖမ်းဆီးဖို့ ကြိုးစားခဲ့တာကို ရပ်တန့်ခဲ့ပါတယ်။  ယွန်းဟာ ဖမ်းဝရမ်းကို လေးစားလိုက် နာမှုမရှိတဲ့အတွက် စိတ်ပျက်ရတယ်လို့ CIO က ဆိုထားပါတယ်။ 

Source-Reuters