စည်းစနစ်ကျန တရားမျှတပြီး သိက္ခာရှိတဲ့ အထွေထွေရွေးကောက်ပွဲဖြစ်စေဖို့နဲ့  ရွေးကောက်ပွဲက နေ ထွက်ပေါ်လာတဲ့ အစိုးရကို နိုင်ငံတော်တာဝန်လွှဲအပ်နိုင်ရေး ဆက်လက်ဆောင်ရွက် သွားမယ်လို့ အာဏာသိမ်း စစ်ခေါင်းဆောင်က ကတိပြု ပြောကြားလိုက်ပါတယ်။   

စစ်အာဏာသိမ်းပြီးကတည်းက ရွေးကောက်ပွဲအကြောင်းမကြာခဏထုတ်ပြောနေတဲ့  စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ဟာ  အာဏာလွှဲပေးမယ့်အကြောင်းကိုတော့ ဒီကနေ့ ဇန်နဝါရီ ၄ ရက်မှကျရောက်တဲ့ (၇၇)နှစ်မြောက် မြန်မာ့လွတ်လပ်ရေးနေ့ အခမ်းအနားသို့ ပေးပို့တဲ့ သဝဏ်လွှာမှာ ထည့်သွင်းပြောဆိုသွားတာပါ။

စစ်ကောင်စီရဲ့ အန္တိမရည်မှန်းချက်ဟာ လွတ်လပ်ပြီး တရားမျှတတဲ့ ပါတီစုံဒီမိုကရေစီ အထွေထွေရွေးကောက်ပွဲကို အောင်မြင်စွာ ကျင်းပဖို့ဖြစ်တယ်၊   ပြည်လုံးကျွတ်   လူဦးရေနဲ့ အိမ်အကြောင်းအရာ သန်းခေါင်စာရင်းကောက်ယူခဲ့ပြီး တိကျမှန်ကန်တဲ့ လူဦးရေစာရင်းကို ဆက်လက်ပြုစုပြီး ပြည်ထောင်စုရွေးကောက်ပွဲ ကော်မရှင်သို့ ပေးပို့ သွားမယ်လို့ စစ်ခေါင်းဆောင်က ပြောပါတယ်။

လေ့လာစောင့်ကြည့်သူတွေကတော့  စစ်ကောင်စီကောက်ခံတဲ့ သန်းခေါင်စာရင်းဟာ မြေပြင်နဲ့ ကွဲလွှဲ မှားယွင်နေကြောင်းနဲ့ တိုက်ပွဲတွေနဲ့ ပဋိပက္ခတွေကြောင့် နိုင်ငံရဲ့ တဝက်လောက်မှာပဲ သန်းခေါင်စာရင်း ကောက်နိုင်ခဲ့တာလို့  ထောက်ပြထားပါတယ်။

အာဏာသိမ်း စစ်ကောင်စီက စီစဉ်ကျင်းပမယ့်  ရွေးကောက်ပွဲဟာ တရားမျှတမှုရှိမှာမဟုတ်လို့ ကန့်ကွက်ကြောင်း NUG အပါအဝင် နွေဦးတော်လှန်ရေးအင်အားစုတွေ တိုင်းရင်းသားလက်နက်ကိုင်တချို့နဲ့  နိုင်ငံတကာက ပြောဆိုထားပြီးသားဖြစ်ပါတယ်။

စစ်ခေါင်းဆောင်ကတော့ နိုင်ငံတော်ကို ဆန့်ကျင်တိုက်ခိုက်နေတဲ့ အဖွဲ့တွေအနေနဲ့ လက်နက်ကိုင်လမ်းစဉ်ကို စွန့်လွှတ်ကာ နိုင်ငံရေးပြဿနာကို နိုင်ငံရေးနည်းလမ်းနဲ့ ဖြေရှင်းဖို့ ကမ်းလှမ်းဖိတ်ခေါ်ကြောင်းနဲ့ လက်နက်ကိုင်အကြမ်းဖက် တောင်းဆိုမှုတွေအပေါ် လိုက်လျော ဖြေရှင်းပေးသွားမှာ မဟုတ်ကြောင်း ထပ်လောင်းပြောပါတယ်။

တွေ့ဆုံဆွေးနွေးမှုရေး ဖိတ်ခေါ်မှုတွေ အကြိမ်ကြိမ်ပြုလုပ်ခဲ့ပေမဲ့  NCA   လက်မှတ်ရေးထိုးထားတဲ့ တိုင်းရင်းသား လက်နက်ကိုင်အဖွဲ့ (EAO)တချို့က NCA ပါ ကတိကဝတ်တွေကို လိုက်နာမှုမရှိဘဲ ချိုးဖောက်နေကြတယ်လို့ စစ်ခေါင်းဆောင်က စွပ်စွဲထားပါတယ်။

မြန်မာနိုင်ငံမှာ ဖြစ်ပေါ်နေတဲ့ ပဋိပက္ခတွေနဲ့ လက်နက်ကိုင်အကြမ်းဖက် တိုက်ခိုက်မှုတွေဟာ နိုင်ငံရေးအမြင် မတူညီမှုတွေကို အခြေခံသကဲ့သို့ တသီးတခြားရပ်တည်လိုစိတ်နဲ့ အတ္တအကျိုးစီးပွားကိုသာ ရှေ့တန်းတင်ခဲ့ခြင်းကြောင့် ပေါ်ပေါက်လာခဲ့တာလို့ စစ်ခေါင်းဆောင် မင်းအောင်လှိုင်က လွတ်လပ်ရေးနေ့ သဝဏ်လွှာမှာ ပြောထားပါတယ်။

အမျိုးသားညီညွတ်ရေးအစိုးရ (NUG)ကလည်း ဒီကနေ့ကျရောက်တဲ့ (၇၇)နှစ်မြောက် လွတ်လပ်ရေးနေ့အခမ်းအနားသို့ ပေးပို့သည့်သဝဏ်လွှာမှာ “အာဏာမက်မောပြီး အရည်အချင်းညံ့ဖျင်းတဲ့ စစ်ခေါင်းဆောင်တွေရဲ့ ကိုယ်ကျိုးအတ္တတွေကြောင့် တိုင်းပြည်ဟာ ဖွံ့ဖြိုးမှု အလွန်နည်းပါးစွာနဲ့ လွတ်လပ်မှု၊ တရားမျှတမှုတို့ကို ခံစားရခြင်း မရှိဘဲ ကမ္ဘာ့အလယ် မျက်နှာငယ်စွာ နှစ်ပေါင်းများစွာ တည်ရှိနေခဲ့တယ်”လို့ ပြောကြားထားပါတယ်။ 

စစ်ခေါင်းဆောင်တွေအနေနဲ့ ခေတ်အဆက်ဆက် ပြုကျင့်လာခဲ့တဲ့ နည်းနာတွေအတိုင်း ပြည်သူလူထုအပေါ် ဖိနှိပ်ညှင်းပန်း သတ်ဖြတ်မှုတွေ တစထက်တစ တိုးမြှင့်လုပ်ဆောင်လာ ခဲ့ကြရာမှ အခုအကြိမ်ဟာ လွန်စွာ ဆိုးရွားတဲ့ အခြေအနေဆိုက်ရောက်လာပြီး တိုင်းပြည်ရဲ့ စီးပွားရေး၊ လုံခြုံရေးနဲ့ အခြေခံအခွင့်အရေးချိုးဖောက်ခံရမှုတွေ စိုးရိမ်ရတဲ့ အခြေအနေဖြစ်လာနေတယ်လို့ဆိုပါတယ်။

မြန်မာပြည်သူအားလုံး အကြမ်းဖက်စစ်အုပ်စုရဲ့ ဖိနှိပ်ညှင်းပန်းမှုတွေကနေ အမြန်ဆုံးကင်းလွတ်ပြီး တရားမျှတခြင်း၊ လွတ်လပ်ခြင်း၊ တန်းတူညီမျှခြင်းစတဲ့ ဖက်ဒရယ်ဒီမိုကရေစီ အနှစ်သာရပြည့်ဝတဲ့ နိုင်ငံသစ်တခုကို အမြန်ဆုံး ထူထောင်နိုင်ကြစေဖို့လည်း NUG အစိုးရက ဆုတောင်းပေးထား ပါတယ်။

အမေရိကန် နိုင်ငံခြားရေးဝန်ကြီး အန်တိုနီ ဂျေ ဘလင်ကန်ကတော့ အကြမ်းဖက်မှုတွေကို အဆုံးသတ်ဖို့ မတရားဖမ်းဆီးထိန်းသိမ်းထားတွေလွှတ်ပေးဖို့၊ လူသားချင်းစာနာမှု အကူအညီတွေ အဟန့်အတားမရှိ ပေးအပ်ခွင့်ပြုဖို့နဲ့ တိုင်းပြည်ကို အားလုံးပါဝင်နိုင်တဲ့ ဒီမိုကရေစီ လမ်းကြောင်းပေါ်သို့ ပြန်လည်ပို့ဆောင်ဖို့ မြန်မာ့လွတ်လပ်ရေးနေ့မှာ စစ်အာဏာရှင်ကို တောင်းဆို ထားပါတယ်။

ဒီမိုကရေစီ၊ တည်ငြိမ်အေးချမ်းမှု၊ စီးပွားရေးတိုးတက်ဖွံ့ဖြိုးမှုနဲ့ လူ့အခွင့်အရေးတွေ ခံစားခွင့်ရရှိရေးအတွက် ကြိုးပမ်းအားထုတ်ရာမှာ အမေရိကန်ပြည်ထောင်စုက မြန်မာပြည်သူတွေနဲ့ အတူ တသားတည်းရပ်တည်တယ်လို့လည်း ဝန်ကြီးဘလင်ကန်က ထုတ်ပြန်ချက်မှာ ပြောပါတယ်။

 Photo: DSINFO