ဧရာဝတီတိုင်း၊ မြောင်းမြခရိုင်၊ ဝါးခယ်မမြို့နယ်မှာ စစ်ကောင်စီတပ်နဲ့ ရဲတွေက အမျိုးသမီးတွေအပါအဝင် ၄ ယောက်ကို PDF ထောက်ပံ့ရေးအဖွဲ့ကဆိုပြီး ဖမ်းဆီးထားတယ်လို့ ဒေသခံတွေဆီက သိရပါတယ်။
ဒီဇင်ဘာ ၂၆ ရက်ကနေ ၃၀ ရက်အထိ ၅ ရက်အတွင်း ဝါးခယ်မမြို့နယ် ရွှေလောင်းကျေးရွာက အမျိုးသား ၂ ယောက်နဲ့ ဆေးရုံရပ်ကွက်နဲ့ လယ်တည်ရပ်ကွက်က အမျိုးသားမီး ၂ ယောက်ကို စစ်ကောင်စီတပ်က PDF ရိက္ခာစုဆောင်းပေးတဲ့အဖွဲ့ကဆိုပြီး စွပ်စွဲဖမ်းဆီးခဲ့တာလို့ သိရပါတယ်။
“အဖမ်းခံရတာ ၄ ယောက်၊ စွပ်စွဲခံရတာပါ၊ သူတို့က PDF လည်း မဟုတ်သလို အဆက်အသွယ် လည်း မရှိပါဘူး။ ငွေညှစ်ချင်လို့ ဖမ်းတာပဲဖြစ်မှာ” လို့ ဒေသခံတယောက်က ပြောပါတယ်။
အဲ့ဒီ ဖမ်းဆီးခံထားရသူတွေကို စစ်ကောင်စီတပ်က ဝါးခယ်မမြို့နယ်ရဲစခန်းမှာ ချုပ်နှောင်ထားတယ်လို့ သိရပါတယ်။
“PDF အဖွဲ့က ထောက်ပံ့ရေးပစ္စည်း စုဆောင်းသူဆိုပြီး ဖမ်းတာ၊ ကောင်လေး ၂ ယောက်က ဉာဏ်စိုး နဲ့ ဇင်မင်းဦးဆိုတဲ့သူတွေလို့ သိရတယ်။ အမျိုးသမီးတွေက မခိုင်ဇာလွင်၊ ဒေါ်မိုးမိုးလှိုင်တို့” လို့ စစ်ကောင်စီတပ်နဲ့ နီးစပ်သူက ပြောပါတယ်။
အဲဒီ အဖမ်းခံရတဲ့ လူငယ် ၄ ယောက်က လယ်ယာလုပ်ငန်းနဲ့ စပါးအရောင်းအဝယ်လုပ်ငန်း လုပ်ကိုင်နေသူတွေဖြစ်ပြီး အသက် ၁၉ နှစ်နဲ့ ၃၅ နှစ်ဝန်းကျင်အရွယ်တွေ ဖြစ်တယ်လို့ နီးစပ်သူတွေ ဆီက သိရပါတယ်။
စစ်ကောင်စီတပ်က ဒီဇင်ဘာလ ပထမ အပတ်ကစတင်ပြီး ဝါးခယ်မမြို့ပေါ်နဲ့ ကျေးရွာတွေအထိ ရဲနဲ့ စစ်ကောင်စီတပ်သားတွေ ပေါင်းကာ လုံခြုံရေးအတွက်ဆိုပြီး တင်းတင်းကျပ်ကျပ် စစ်ဆေးနေတယ်လို့ သိရပါတယ်။
