မန္တလေးတိုင်း၊ နွားထိုးကြီးမြို့နယ်ထဲကို စစ်ကောင်စီတပ်က ဒီဇင်ဘာ ၂၃ ရက် ညနေ ၆ နာရီဝန်းကျင်မှာ လေယာဥ်နဲ့ ဗုံးကြဲချခဲ့တဲ့အတွက် ဒေသခံ ၂ ယောက် သေဆုံးသွားတယ်လို့ သိရပါတယ်။
နွားထိုးကြီးမြို့နယ်၊ ပြည်သူ့အုပ်ချုပ်ရေးအဖွဲ့၊ လူ့အခွင့်အရေးတာဝန်ခံက “နွားထိုးကြီးမြို့ရဲ့ အရှေ့ဘက် ၆ မိုင်လောက်မှာရှိတဲ့ ဒေါင့်ဘိုးရွာကိုဗုံးကြဲသွားတာပါဗျ။ ရွာလယ်ကောင်က အိမ်ပေါ်ကိုတည့်တည့်ကျတယ်။ တအိမ်တည်းမှာနေတဲ့ လင်မယား ၂ ယောက်ကတော့ ပွဲချင်းပြီးဆုံးသွားပါတယ်။ အမျိုးသားက ခေါင်းပြတ်သွားတယ်လို့ သိရပါတယ်။ ခိုင်းနွားတချို့လည်း သေတယ်လို့လည်း သိရတယ်ဗျ။ ပြည်သူလူထုအများစုက အမှန်တရားဘက်မှာပဲထောက်ခံကြတာကို သူတို့လည်းသိနေတော့လေ ပြည်သူကိုအဓိကထားပြီး တိုက်ခိုက်နေတယ်လို့ မြင်တယ်ဗျ”လို့ ပြောပါတယ်။
အဆိုပါဗုံးကြဲတိုက်ခိုက်ခံရမှုကြောင့် ဒေါင့်ဘိုးကျေးရွာက လူနေအိမ် ၅ လုံးထက်မနည်း ပျက်စီးသွားခဲ့သလို ရွာခံ ၃ ယောက်ထက်မနည်း ထိခိုက်ဒဏ်ရာတွေရရှိသွားခဲ့ကြတယ်လို့ ဆိုပါတယ်။
Natogyi People Defence Force - NPDF (မြင်းခြံခရိုင် အမှတ် ၄/၁၀) တပ်ရင်းမှူး ကိုစိုးအောင်က “တိုက်ပွဲဖြစ်တာရှိလို့မဟုတ်ပါဘူး။ အဲ့ဒိနေ့မနက်ပိုင်းမှာ နွားထိုးကြီးမြို့နယ်ထဲက ရန်ကုန်-မန္တလေး အမြန်လမ်း မိုင်တိုင် ၃၁၈ မှာတော့ ကျနော်တို့တပ်ဖွဲ့ဝင်တွေက မော်တော်ယာဉ်တွေကိုတော့ တားဆီးစစ်ဆေးတာတွေလုပ်ခဲ့ကြတယ်ပေါ့ဗျာ။ အဲ့ဒါပြီး ညနေပိုင်းမှာ အမြန်လမ်းရဲ့ အနောက်မြောက်ဘက် ၁၀ မိုင်လောက်က ဒေါင့်ဘိုးရွာကို စစ်တပ်ဘက်က လေယာဥ်နဲ့ဗုံးကြဲခဲ့တာပါ”လို့ DVB ကို ပြောပါတယ်။
ဒီဇင်ဘာ ၂၄ ရက် ည ၇ နာရီဝန်းကျင်မှာလည်း နွားထိုးကြီးမြို့နယ်ထဲက မြိုင်သာကျေးရွာကို စစ်ကောင်စီတပ်က လေကြောင်းကနေ ပေါင် ၅၀၀ ဗုံး ထပ်မံကြဲသွားပြီး ထိခိုက်ဒဏ်ရာရသူဘယ်လောက်ရှိလဲ မသိရသေးပါတယ်။
နွားထိုးကြီးမြို့နယ်ထဲကို စစ်ကောင်စီတပ်ဘက်က လေကြောင်းတိုက်ခိုက်မှုတွေ ဆက်တိုက်ပြုလုပ်လာနေပြီး နောက်ထပ်လေကြောင်းတိုက်ခိုက်တာတွေဆက်လုပ်လာမှာကို ဒေသခံတွေ စိုးရိမ်ပူပန်နေကြပါတယ်။
ပြီးခဲ့တဲ့ ဒီဇင်ဘာ ၂ ရက်မှ ၅ ရက်အထိ နွားထိုးကြီးမြို့နယ်မှာ စစ်ကောင်စီတပ်ရဲ့ လေကြောင်းတိုက်ခိုက်မှုတွေကြောင့် နဘဲမြစ်ကျေးရွာက အမျိုးသား ၄ ယောက်၊ ကွမ်းအုံကျေးရွာက အမျိုးသမီး တယောက်၊ အသက် ၁၁ နှစ်အရွယ် ကလေးငယ် တယောက်၊ လုံးတောကျေးရွာက အသက် ၉ နှစ်အရွယ်ကလေး တယောက်၊ ကန်နှောင်းကျေးရွာက အမျိုးသား တယောက်၊ လက်ဝဲ-မြင်းနီကျေးရွာက အမျိုးသား တယောက်၊ အောင်ပန်းကုန်းကျေးရွာက အမျိုးသား တယောက်၊ အမျိုးသမီး တယောက်နဲ့ ၁၃ နှစ်အရွယ်ကလေးငယ် တယောက်တို့ သေဆုံးခဲ့ကြရသေးတယ်လို့လည်း မှတ်တမ်းတွေအရ သိရပါတယ်။
