မန္တလေးမြို့က ရွှေစင်အကယ်ဒမီရွှေဆိုင်မှာ ဒီဇင်ဘာ ၁၈ ရက် ညနေ ၅ နာရီခွဲဝန်းကျင်က ကျပ်သိန်း ၃၀၀၀၀ ကျော်တန်ဖိုးရှိ ရွှေထည်တွေ ဓားပြတိုက်ခံလိုက်ရတယ်လို့ မြို့ခံထံက သိရပါတယ်။

မဟာအောင်မြေမြို့နယ်ထဲက ဟေမမာလာမြောက်ရပ်ကွက်၊ ၇၇ လမ်းမပေါ်မှာရှိတဲ့ ၃၆ လမ်းနဲ့ ၃၇ လမ်းကြားမှာ ဖွင့်ထားတဲ့ ရွှေစင်အကယ်ဒမီရွှေဆိုင်မှာ ဓားပြတိုက်ခံလိုက်ရတာလို့ မန္တလေးမြို့ခံတယောက်က  ပြောပါတယ်။

အဆိုပါ ရွှေဆိုင်ဓားပြတိုက်ခံရမှုမှာ ရွှေထည်ပစ္စည်းတွေထည့်ထားတဲ့ ပလတ်စတစ်ဘူး ၃ ဘူး ဓားပြတိုက်ခံလိုက်ရတယ်လို့ ဆိုပါတယ်။

ပရဟိတအဖွဲ့ဝင်တယောက်က “ဆိုင်ပိတ်ခါနီးလောက်မှာ ဝန်ထမ်း ၄ ယောက်နဲ့ ဆိုင်ပိုင်ရှင်ရှိနေတဲ့အချိန် ဆိုင်ကယ် ၂ စီးနဲ့ လူလတ်ပိုင်း ၃ ယောက်က ပစ္စတိုသေနတ် ၂ လက်နဲ့ ဆိုင်ထဲဝင်လာပြီးတော့ ဓားပြတိုက်သွားတာတဲ့။ ရဲစခန်းက မှတ်တမ်းတွေအရကတော့ ရွှေဆိုင်က ရွှေထည်ပစ္စည်းတွေ ထည့်ထားတဲ့ ပလတ်စတစ်ဘူး ၃ ဘူး ယူသွားတယ်။ အဲ့ထဲမှာတော့ ရွှေ ၄ ပိဿာကျော် ပါတယ်တဲ့။ အဲဒီရွှေထည်တွေက သိန်း ၃၀၀၀၀ ကျော်လောက် တန်ဖိုးရှိတယ်လို့ သိရပါတယ်ဗျ” လို့ DVB ကို ပြောပါတယ်။

ဖြစ်စဥ်နဲ့ပတ်သက်ပြီး အသေးစိတ်သိရှိနိုင်ဖို့ ဓားပြတိုက်ခံခဲ့ရတဲ့ ရွှေစင်အကယ်ဒမီရွှေဆိုင်နဲ့ မဟာအောင်မြေမြို့နယ် မြို့မရဲစခန်းတွေကို DVB က ဖုန်းနဲ့ဆက်သွယ်ခဲ့ပေမဲ့ လက်ခံဖြေဆိုသူ မရှိပါဘူး။

စစ်တပ်က အာဏာသိမ်းပြီးနောက် ၂၀၂၂ ခုနှစ်ကစတင်ပြီး မန္တလေးမြို့ပေါ်မှာ ဘဏ်၊ ရွှေဆိုင်တွေနဲ့ ပြည်သူပိုင် လူနေအိမ်တချို့ ဓားပြတိုက်ခံရမှု မကြာခဏ ဖြစ်ပွားနေပြီး အဆိုပါ ဓားပြတိုက်မှုတွေမှာ စစ်ကောင်စီလက်အောက်ခံ ပျူစောထီးတွေ ပါဝင်ပတ်သက်နေတယ်လို့ မန္တလေးမြို့ခံက ပြောပေမဲ့ သီးခြားအတည်ပြုနိုင်ခြင်း မရှိပါဘူး။