တနင်္သာရီတိုင်း၊ ထားဝယ်မြို့အခြေစိုက် ခမရ ၂၅ တပ်ရင်းက စစ်ကောင်စီတပ်သားတယောက် လက်နက်ခဲယမ်းတွေနဲ့အတူ အလင်းဝင်ရောက်ခဲ့ကြောင်း ဓဝယ်အမျိုးသားလွတ်မြောက်ရေး တပ်တော် (DNLA) ထံက သိရပါတယ်။
ထားဝယ်မြို့အခြေစိုက် ခမရ ၂၅ တပ်ရင်းက တပ်သား ကိုဖိုးထွေးဟာ ပြီးခဲ့တဲ့ ဒီဇင်ဘာ ၁၂ ရက်မှာ လက်နက်ခဲယမ်းတွေနဲ့အတူ အလင်းဝင်ရောက်ခဲ့တာလို့ DNLA အဖွဲ့ ပြန်ကြားရေးတာဝန်ရှိသူတယောက်က ပြောပါတယ်။
“သူက ဒီဇင်ဘာလ ၈ ရက်နေ့ ညကတည်းက ထွက်ပြေးလာတာ။ ကျနော်တို့အဖွဲ့ဆီကို ၁၂ ရက်နေ့မှာ ရောက်တာပေါ့။ လက်နက်ခဲယမ်းတွေပါ ယူဆောင်လာလို့ ကျနော်တို့အဖွဲ့က ဆုငွေချီးမြှင့်ခဲ့သလို ပြည်ပထွက်ဖို့ဆန္ဒရှိနေလို့ ကူညီပို့ဆောင်ပေးခဲ့ပါတယ်။”
အလင်းဝင်ရောက်လာတဲ့ စစ်ကောင်စီတပ်သား ကိုဖိုးထွေးနဲ့အတူ MA တလက်၊ ကျည်ဘောက် ၃ ခု၊ ကျည် ၁၂၀ တောင့်၊ ဓားမြှောင်တချောင်းနဲ့ စစ်ယူနီဖောင်း အပြည့်အစုံကို ယူဆောင်ခဲ့တာကြောင့် DNLA က မြန်မာကျပ်ငွေ သိန်း ၅၀ ဆုချီးမြှင့်ခဲ့ကြောင်း သိရပါတယ်။
စစ်ကောင်စီတပ်က အလင်းဝင်ရောက်လိုတဲ့ ဘယ်သူမဆို ကြိုဆိုလျက်ရှိကြောင်းလည်း ဓဝယ်အမျိုးသားလွတ်မြောက်ရေးတပ်တော် (DNLA) က အသိပေး ထုတ်ပြန်ထားတာပါ။
အလားတူ ပြီးခဲ့တဲ့ နိုဝင်ဘာလအတွင်းကလည်း ထားဝယ်ခရိုင်အတွင်းရှိ စစ်ကောင်စီ တပ်ရင်း၊ တပ်စခန်းတွေက တပ်သား ၆ ယောက်ထက်မနည်း ပြည်သူ့ကာကွယ်ရေးတပ်တွေထံ ဘက်ပြောင်းခိုလှုံခဲ့သလို အများစုမှာ စစ်မှုထမ်းသင်တန်းဆင်းတွေ ဖြစ်ကြောင်း ပြည်သူ့ကာကွယ်ရေးတပ်ဖွဲ့တွေရဲ့ သတင်းထုတ်ပြန်ချက်အရ သိရပါတယ်။
Photo: DNLA
