ရန်ကုန်တိုင်း၊ မှော်ဘီအခြေစိုက် ရဲတပ်ရင်းတခုက ရဲတပ်သားတယောက်ဟာ ဒီဇင်ဘာ ၁၆ ရက်မှာ လက်နက်ခဲယမ်းတွေနဲ့အတူ တောင်သာမြို့နယ် ပြည်သူ့ကာကွယ်ရေးအဖွဲ့ဆီကို အလင်းဝင်ရောက်လာတယ်လို့ သိရပါတယ်။

တောင်သာမြို့နယ် ပြည်သူ့ကာကွယ်ရေးအဖွဲ့ရဲ့ ပြန်ကြားရေးတာဝန်ခံက “မှော်ဘီရဲတပ်ရင်း ၅ က ရဲတပ်သားတယောက်က လက်နက်ခဲယမ်းတွေနဲ့ ကျနော်တို့အဖွဲ့ဆီကို အလင်းဝင်လာခဲ့တာပါ” လို့ ပြောပါတယ်။

အဆိုပါရဲတပ်သားဟာ G3 သေနတ်တလက်၊ ကျည် ၂၂၁ တောင့်တို့နဲ့အတူ အလင်းဝင်ရောက်လာတဲ့အတွက် ဂုဏ်ပြုဆုငွေ ပေးအပ်ထားတယ်လို့လည်း ဆိုပါတယ်။

တောင်သာမြို့နယ် ပြည်သူ့ကာကွယ်ရေးအဖွဲ့ တာဝန်ခံ ကိုပေါ့ဘာက “အခုအလင်းဝင်လာတဲ့ ရဲတပ်သားကို ဆုကြေးငွေ သိန်း ၅၀ ပေးအပ်ထားပါတယ်။ သူနဲ့ဆိုရင် မှော်ဘီရဲတပ်ရင်း ၅ က အလင်းဝင်လာတဲ့သူ ၂ ယောက်ရှိပါပြီ” လို့ DVB ကို ပြောပါတယ်။

စစ်ကောင်စီလက်အောက်မှာ ကျန်ရှိနေကြသေးတဲ့ စစ်ကောင်စီလက်အောက်ခံတွေကိုလည်း အမြန်ဆုံး အလင်းဝင်ရောက်ကြဖို့ တိုက်တွန်းထားပါတယ်။

ပြီးခဲ့တဲ့ သြဂုတ် ၁၇ ရက်ကလည်း ရန်ကုန် ရဲတပ်ရင်း ၅ မှော်ဘီက ရဲတပ်သား မျိုးချစ်သူဟာ လက်နက်ခဲယမ်းတွေနဲ့အတူ အလင်းဝင်ရောက်လာခဲ့တာကြောင့် ဂုတ်ပြုဆုငွေ သိန်း ၅၀ ချီးမြှင့်ပေးအပ်ခဲ့ပြီး လွတ်မြောက်နယ်မြေတခုကို ပို့ဆောင်ပေးထားတယ်လို့လည်း တောင်သာမြို့နယ် ပြည်သူ့ကာကွယ်ရေးအဖွဲ့ဆီကနေ သိရပါတယ်။