ပဲခူးတိုင်း၊ ညောင်လေးပင်ခရိုင်၊ လယ်ဒိုမြို့နယ်မှာ စစ်မှုထမ်းအပတ်စဉ် ၂ သင်တန်းဆင်း စစ်ကောင်စီတပ်သားတယောက် လက်နက်ခဲယမ်းတွေနဲ့အတူ အလင်းဝင်ရောက်ခဲ့ကြောင်း ကရင်အမျိုးသားအစည်းအရုံး (KNU) ဗဟိုကနေ သိရပါတယ်။

ညောင်လေးပင်ခရိုင်၊ လယ်ဒိုမြို့နယ် တပ်ရင်း ၉ နယ်မြေအတွင်းရှိ စစ်ကောင်စီတပ် ခမရ ၅၈၉ တပ်ရင်းမှာ တာဝန်ထမ်းဆောင်ခဲ့တဲ့ ပြည်သူ့စစ်မှုထမ်းသင်တန်း အပတ်စဉ် ၂ ဆင်း တပ်သား ကျော်မင်းအောင်ဟာ ပြီးခဲ့တဲ့ နိုဝင်ဘာ ၁၄ ရက်က လက်နက်တွေနဲ့အတူ KNLA တပ်ရင်း ၉ ထံ အလင်းဝင်ရောက်ခဲ့တာဖြစ်ကြောင်း နိုဝင်ဘာ ၂၅ ရက်မှာ သတင်းထုတ်ပြန်ခဲ့တာပါ။

စစ်ကောင်စီတပ်သား ကျော်မင်းအောင်နဲ့အတူ MA-3 ၁ လက်၊ ကျည်ဘောက် ၅ ခု၊ လက်ပစ်ဗုံး ၁ လုံးနဲ့ ၅.၅၆ ကျည် ၁၅၀ တောင့်တို့ကို KNLA တပ်ရင်း ၉ ထံ အပ်နှံခဲ့ကြောင်း ထုတ်ပြန်ချက်မှာ ပါရှိပါတယ်။

ဒါ့အပြင် လက်နက်ချ အလင်းဝင်လာတဲ့ စစ်ကောင်စီတပ်သားကို ကရင်အမျိုးသားလွတ်မြောက်ရေးတပ်မတော် (KNLA) တပ်ရင်း ၉ က ဆုကြေးငွေ ကျပ် ၁၀ သိန်းနဲ့ လယ်ဒိုမြို့နယ်က ဆုငွေကျပ် ၁၀ သိန်း စုစုပေါင်း ကျပ်သိန်း ၂၀ ပေးအပ်ချီးမြှင့်ခဲ့ကြောင်း သိရပါတယ်။

အလားတူ ပြီးခဲ့တဲ့ နိုဝင်ဘာ ၁၈ ရက်ကလည်း စစ်ကောင်စီရဲ့ စစ်မှုထမ်းဥပဒေနဲ့ စစ်သားစုဆောင်းခံခဲ့ရတဲ့ တပ်သား ၆ ယောက် ပြည်သူ့ကာကွယ်ရေးတပ်မတော် PDF စစ်ကြောင်းဖြစ်တဲ့ ဒေါနစစ်ကြောင်းထံ အလင်းဝင်ရောက်ခဲ့သေးကြောင်း တော်လှန်ရေးအဖွဲ့တွေထံက သိရပါတယ်။