ရခိုင်ပြည်နယ်၊ တောင်ကုတ်မြို့ အခြေစိုက် အမှတ် (၅) စစ်ဆင်ရေးကွပ်ကဲမှုဌာနချုပ် (စကခ ၅) ကို သိမ်းပိုက်လိုက်ပြီး တောင်ကုတ်မြို့နယ်တခုလုံးကိုလည်း အပြီးသတ်ထိန်းချုပ်နိုင်ပြီလို့ အာရက္ခတပ်တော် (AA) ပြောခွင့်ရသူ ခိုင်သုခ က DVB ကို အတည်ပြုပြောပါတယ်။ 

ဒီဇင်ဘာ ၁၅ ရက် ညနေ ၄ နာရီကျော်မှာ အပြီးသတ် ရှင်းလင်းသိမ်းပိုက်လိုက်တာဖြစ်ပြီး (စကခ ၅) က ထွက်ပြေးလွတ်မြောက်နေတဲ့ စစ်ကောင်စီတပ်ဖွဲ့ဝင်တွေကို လိုက်လံရှင်းလင်း ဖမ်းဆီးနေတယ်လို့လည်း ဆိုပါတယ်။

စစ်ကောင်စီဘက်ကတော့ စကခ ၅ သိမ်းပိုက်ခံရတာနဲ့ ပတ်သက်လို့ သတင်းထုတ်ပြန်တာ မရှိသေးပါဘူး။

ဒီဇင်ဘာ ၈ ရက်ကလည်း  မောင်တောမြို့နယ်မှာ နခခ (၅) ကို အာရက္ခတပ်တော် (AA) က အလုံးစုံသိမ်းပိုက်ရရှိပြီး စစ်ကောင်စီတပ်သား ၄၅၀ ထက်မနည်း သေဆုံးခဲ့ကာ စကခမှူး ဗိုလ်မှူးချုပ်သူရိန်ထွန်း ဦးဆောင်တဲ့ စစ်ကောင်စီတပ်ဖွဲ့ဝင်တွေနဲ့ ရိုဟင်ဂျာလက်နက်ကိုင် သုံ့ပန်းအများအပြားကို လက်နက်ခဲယမ်းတွေနဲ့အတူ ဖမ်းဆီးရမိတယ်လို့ AA က ဒီဇင်ဘာ ၁၀ ရက်မှာ ထုတ်ပြန်ပါတယ်။

ဂွမြို့နယ်အတွင်းမှာလည်း စစ်ကောင်စီတပ်စခန်းတွေကို AA က တိုက်ခိုက်နေတာကြောင့် တိုက်ပွဲတွေ ဖြစ်ပွားနေပါတယ်။

ရခိုင်ပြည်နယ်ထဲမှာ  အာရက္ခတပ်တော်က မြို့တွေတမြို့ပြီး တမြို့ သိမ်းပိုက်နေပြီး စစ်ကောင်စီတပ်တွေ စစ်ရှုံးနေချိန်မှာ စစ်ခေါင်းဆောင်ကတော့ AA တပ်ဖွဲ့တွေ လက်နက်ချကြဖို့ တိုက်တွန်းတောင်းဆိုလိုက်ပါတယ်။