စစ်ကိုင်းတိုင်း၊ စစ်ကိုင်းမြို့နယ်မှာ ဒီဇင်ဘာ ၇ ရက်က စစ်ကောင်စီတပ် သတ်ဖြတ်လို့ PDF ရဲဘော်တယောက် ကျဆုံးခဲ့သလို လက်နက်ကြီးနဲ့ ပစ်ခတ်ခဲ့တာကြောင့်လည်း ဒေသခံပြည်သူ ၃ ယောက် သေဆုံးခဲ့တယ်လို့ ဒေသခံ PDF ကနေ သိရပါတယ်။

စစ်ကိုင်းအနောက်ဘက်က ကံတက်ကျွန်း (ကတက်ကျွန်း)ရွာမှာ စစ်ကိုင်းတပ်မ ၃၃ လက်အောက်ခံတပ်က စစ်ကြောင်းထိုးပြီး သတ်ဖြတ်သွားတာလို့ စစ်ကိုင်းအခြေစိုက် ပြည်သူ့ကာကွယ်ရေးတပ်ဖွဲ့တခုရဲ့ တာဝန်ခံတယောက်က ပြောပါတယ်။

စစ်ကောင်စီတပ်ဟာ ဧရာဝတီမြစ်ထဲက ကျွန်းရွာတရွာဖြစ်တဲ့ အဆိုပါ ကတက်ကျွန်းကျေးရွာကို စစ်ကြောင်းထိုးပြီး PDF ရဲဘော်တယောက်ကို ဖမ်းဆီးသတ်ဖြတ်ကာ လက်နက်ကြီးတွေနဲ့ပါ ပစ်ခတ်ခဲ့တာကြောင့် ဒေသခံပြည်သူ ၃ ယောက် သေဆုံးခဲ့ရတာဖြစ်တယ်လို့ ဆိုပါတယ်။

စစ်ကိုင်းမြို့နယ် ပြည်သူ့ကာကွယ်ရေးတပ်ဖွဲ့ရဲ့ တာဝန်ခံက “စစ်ကိုင်း ငါးထပ်ကြီးဘုရားမှာ တပ်စွဲထားတဲ့ကောင်တွေက အင်အား ၁၀၀ နီးပါးလောက်နဲ့ ကတက်ကျွန်းရွာကို မနက် ၇ နာရီလောက်မှာ ဝင်စီးတယ်။ ဧရာဝတီမြစ်ထဲမှာလည်း စစ်သင်္ဘော ၃၊ ၄ စီးနဲ့ ဝိုင်းထားသေးတယ်။ အဲဒီ ကတက်ကျွန်းရွာက ရပ်ကျေး ပကဖ ရဲဘော် ၁ ယောက်ကို ဖမ်းသွားပြီး အသတ်ခံရတယ်။ နောက်ပြီးတော့မှ အလောင်းကို မီးရှို့သွားတာလို့ သိရတယ်ဗျ။ ငါးထပ်ကြီးဘုရားမှာ ကျန်နေခဲ့တဲ့ကောင်တွေကလည်း ၆၀ မမ လက်နက်ကြီးတွေနဲ့ပစ်လို့ အဲဒီနားကရွာတွေက ရွာသား ၃ ယောက် သေသွားတယ်၊ ၁ ယောက် ဒဏ်ရာရသွားတယ်” လို့ DVB ကို ပြောပါတယ်။

စစ်ကောင်စီတပ်ဖွဲ့ဝင်တွေရဲ့ ဖမ်းဆီးသတ်ဖြတ်ခံရသူဟာ ရပ်ကျေး ပကဖ ရဲဘော်ကတုံး ဖြစ်ပါတယ်။

စစ်ကောင်စီတပ်က  ၆၀ မမ လက်နက်ကြီးပစ်ခတ်လို့ ညောင်ကုန်းကျေးရွာက အသက် ၅၀ အရွယ် အမျိုးသမီးတယောက်နဲ့ ရိပ်သာကျေးရွာက အမျိုးသားတယောက်တို့ ထိမှန်သေဆုံးခဲ့​သလို ညောင်ကုန်းကျေးရွာက အသက် ၇၀ ဝန်းကျင် အမျိုးသားတယောက်လည်း လက်နက်ကြီးကျည် ကျရောက်ပေါက်ကွဲတဲ့အသံကြောင့် ရုတ်တရက် နှလုံးခုန်ရပ်တန့်ကာ သေဆုံးသွားရတာဖြစ်တယ်လို့ ဒေသခံ PDF ကပါတယ်။

သေဆုံးသွားသူ အမျိုးသမီးရဲ့ အသက် ၃၀ ဝန်းကျင်ရှိတဲ့ သားဖြစ်သူဟာလည်း လက်မောင်းကို ကျည်စထိမှန် ဒဏ်ရာရခဲ့တာကြောင့် ဆေးကုသမှုခံယူနေရ​ ပါတယ်။

ကတက်ကျွန်းကျေးရွာအနီးက တိုက်ပွဲမှာ PDF အလောင်းတလောင်း၊ လက်လုပ်သေနတ်အရှည် ၉ လက်၊ လက်လုပ်စိန်ပြောင်းတလက်၊ လက်လုပ်လက်ပစ်ဗုံး ၁၀ လုံး၊ လက်လုပ်မိုင်းမျိုးစုံ ၁၂ လုံးနဲ့ ပြောက်ကျားယူနီဖောင်းတစုံတို့ကို သိမ်းဆည်းရရှိခဲ့တယ်လို့ စစ်ကောင်စီဝါဒဖြန့် တယ်လီဂရမ်ချယ်နယ်တွေမှာ ရေးသားဖော်ပြကြပါတယ်။