မောင်တောအခြေစိုက် နယ်ခြားစောင့်ရဲတပ်ဖွဲ့ခွဲ ၅ ကို ဦးဆောင်နေတဲ့ အမှတ် ၁၅ စစ်ဆင်ရေးကွပ်ကွဲမှု ဌာနချုပ်မှ စကခမှူး ဗိုလ်မှူးချုပ် သူရိန်ထွန်းနဲ့ အရာရှိအချို့ ထွက်ပြေးသွားတယ်လို့ နခခနဲ့ နီးစပ်တဲ့ သတင်းအရင်းအမြစ်တွေဆီက သိရပါတယ်။

မောင်တောအခြေစိုက် နခခ ၅ မှ ဗိုလ်မှူးချုပ် သူရိန်ထွန်းနဲ့အဖွဲ့ဟာ  ARSA အဖွဲ့ရဲ့ အကူအညီနဲ့ ဒီဇင်ဘာ ၄ ရက်က ထွက်ပြေးခဲ့တာလို့ နခခ သတင်းအရင်းအမြစ်က DVB ကို ပြောပါတယ်။

“အဲ့နေ့က ARSA အဖွဲ့နဲ့ AA အဖွဲ့တွေ မောင်တောမြောက်ပိုင်းမှာ အပြန်အလှန် ပစ်ခတ်မှုတွေ ဖြစ်သေးတယ်၊ ကစခမှူးက အရင်ကတည်းက ပြည်သူ့စစ်တွေ စည်းရုံးရေးကောင်းတော့ ASRA အဖွဲ့တွေကို လာခေါ်ထုတ်သွားခိုင်းတာဖြစ်မယ်။”

နပခ (အမ်း) နဲ့ နခခ ၅ ကို စီမံကွပ်ကဲရတဲ့ အမှတ် ၃ စစ်ဆင်ရေးအထူးတပ်ဖွဲ့မှူး ဒုဗိုလ်ချုပ်ကြီး တေဇကျော်က ဗိုလ်မှူးချုပ် သူရိန်ထွန်းနဲ့ အဖွဲ့ကို လိုက်လံရှာဖွေ ဖမ်းဆီးခိုင်းထားတယ်လို့လည်း တပ်တွင်းသတင်းအရင်းမြစ်တယောက်က DVB ကို ပြောပါတယ်။

“အမ်းမှာ တိုင်းမှူး မရှိ နခခ ၅ မှာ စကခမှူးကလည်း ထွက်ပြေးတော့ ပရမ်းပတာ ဖြစ်နေတယ်။ ဗိုလ်မှူးချုပ် သူရိန်ထွန်း ဆို စကခ ၁၅ ကို AA က လာတိုက်တုန်းက နခခ ၅ ကို တယ်၊ နခခ ၅ ကို ထပ်တိုက်ခံရတော့ ထပ်ပြေးတယ်၊ အခုက ဘယ်ကို ပြေးသွားလဲမသိဘူး။ တိုက်ပွဲဖြစ်နေတော့ သူ ပြေးသွားတာ ဘယ်သူမှ မသိလိုက်ဘူး။” 

အာရက္ခတပ်တော် (AA) အဖွဲ့က ဘူးသီးတောင်အခြေစိုက် အမှတ် ၁၅ စစ်ဆင်ရေးကွပ်ကဲမှုဌာနချုပ်ကို အခုနှစ် မေ ၂ ရက်မှာ သိမ်းယူခဲ့ပြီး အဲဒီတုန်းက ဒုစကခမှူးနဲ့ တပ်သားရာနဲ့ချီကာ လက်နက်ချအညံ့ခံခဲ့ပါတယ်။

အရင်က အလယ်ပိုင်းတိုင်းစစ်ဌာနချုပ် တိုင်းစစ်ဦးစီးချုပ်ဖြစ်တဲ့ ဗိုလ်မှူးချုပ် သူရိန်ထွန်းကို ၂၀၂၂ ခုနှစ် ဒီဇင်ဘာလအတွင်းမှာ ဘူးသီးတောင်အခြေစိုက် စကခမှူး တာဝန်နဲ့ မောင်တောတပ်နယ်မှူးအဖြစ် တာဝန်ပေးခဲ့တာပါ။

မန္တလေးမှာ တိုင်းစစ်ဦးစီးချုပ် တာဝန်ယူတုန်းကလည်း ဗိုလ်မှူးချုပ် သူရိန်ထွန်းဟာ ပြည်သူ့စစ်အဖွဲ့တွေဖွဲ့ပြီး လက်နက်တွေ ထုတ်ပေးခဲ့တဲ့သူတယောက်ပါ။