မန္တလေး၊ အမရပူရမြို့နယ်မှာ နိုဝင်ဘာ ၂၃ ရက် မနက် ၁၁ နာရီခွဲလောက်က အလယ်တန်းပြ ဆရာမတယောက်ကို ဓာနဲ့ထိုးသတ်ပြီး ဆိုင်ကယ်လုယက်မှု ဖြစ်ခဲ့တယ်လို့ မြို့ခံတွေဆီက သိရပါတယ်။

အမရပူရမြို့နယ်၊ တပ်ကြီးကျေးရွာ၊ အိုးတုတ္တန်းတိုးဂိတ်အကျော်မှာ အမျိုးသား ၂ ယောက်က အလယ်တန်းပြဆရာမ ၁ ယောက်ကို ဓားနဲ့ထိုးသတ်ပြီး ဆိုယ်ကယ်လုယက်ခဲ့တာလို့ မြို့ခံတယောက်က DVB ကို ပြောပါတယ်။

"အမရပူရမှာ ဒီလထဲ လုယက်မှုဖြစ်တာ ၃ မှုရှိပြီ။ Denko ဆီဆိုင်ရယ်၊ မြို့ထဲမှာလုတာရယ်၊ အခု လုယက်မှုမှာတော့ မသေမချင်း ဓားနဲ့ထိုးသတ်ပြီး ဆိုင်ကယ်ယူသွားတယ်။ ဘယ်အမှုမှမမိဘူး။ ရဲတွေက လိုင်းကြေးတောင်းဖို့ပဲ သိတယ်” လို့ ပြောပါတယ်။

ဓားနဲ့ထိုးသတ်ပြီး ဆိုင်ကယ်လုယက်ခံရသူဟာ အမရပူရမြို့နယ်၊ ကြည့်မြင်တိုင်ကျေးရွာ အထက်တန်းကျောင်းခွဲက အလယ်တန်းပြဆရာမ ဒေါ်အေးမြတ်ခိုင် ဖြစ်တယ်လို့ ပညာရေးမှူးရုံးနဲ့ နီးစပ်တဲ့ သတင်းအရင်းအမြစ်က DVB ကို ပြောပါတယ်။

“ရဲဘက်က လုယက်သူ ၂ ယောက်ထဲက တယောက်မိတယ်လို့ ပြောတယ်။ ဟုတ် မဟုတ်တော့ မသိဘူး။ ဒါပေမဲ့ အမရပူရမှာ ရဲတွေက ဒုစရိုက်မှုကျူးလွန်တဲ့သူတွေကို မဖမ်းဘဲ လွှတ်ပေးထားမယ်ဆိုရင် လူသတ် လုယက်မှုတွေ ထပ်ဖြစ်နေမှာပဲ” လို့ ပြောပါတယ်။

ပြီးခဲ့တဲ့ နိုဝင်ဘာ ၁၇ ရက် မွန်းလွဲ ၂ နာရီခွဲက အမရပူရမြို့နယ်၊ မုတ်ပုလဲကျေးရွာမှာ ဖွင့်လှစ်ထားတဲ့ Denko စက်သုံးဆီအရောင်းဆိုင်မှာ အမျိုးသားတယောက်က သေနတ်ပစ်ဖောက်ပြီး ငွေ ၁၂ သိန်းကျော် လုယက်ခဲ့ပါတယ်။

ဇူလိုင် ၁၄ ရက်ကလည်း မှန်တန်းရပ်ကွက်၊ ဗားကရာကျောင်းကွေ့အနီးမှာ စျေးရောင်းပြီးပြန်လာတဲ့  အမျိုးသားတစ်ယောက် သေနတ်နဲ့ပစ်ပြီး လုယက်ခံခဲ့ရပါသေးတယ်။