မြန်မာနိုင်ငံကနေ ဘင်္ဂလားဒေ့ရှ်နိုင်ငံကို G to G အစီအစဉ်နဲ့   ဆန်တန်ချိန် ၂ သိန်း ထပ်မံတင်ပို့နိုင်ဖို့ ဆွေးနွေးညှိနှိုင်းနေတယ်လို့ စစ်ကောင်စီဩဇာခံ စီးပွားကူးသန်း ဝန်ကြီးဌာနဆီက သိရပါတယ်။

အခု ၂၀၂၄-၂၅ ဘဏ္ဍာနှစ်အတွင်းမှာ အရောင်းအဝယ်စာချုပ်ချုပ်ဆိုပြီး တင်ပို့နိုင်ဖို့အတွက် ဈေးနှုန်းဆိုင်ရာကိစ္စရပ်‌တွေကိုလည်း  ပြီးခဲ့တဲ့ရက်ပိုင်းမှာ နှစ်ဘက် အသေးစိတ်ညှိနှိုင်းထားပြီး ဖြစ်တယ်လို့လည်း သိရပါတယ်။

မြန်မာနိုင်ငံနဲ့ ဘင်္ဂလားဒေ့ရှ်နိုင်ငံတို့အကြား G to G စနစ်နဲ့ ဆန်ရောင်းဝယ်နိုင်ရေးအတွက် ဆန်ကုန်သွယ်မှုဆိုင်ရာနားလည်မှုစာချွန်လွှာကို ၂၀၁၇ ခုနှစ် စက်တင်ဘာလမှာ  လက်မှတ်ရေးထိုး ခဲ့ကြတာ ဖြစ်ပါတယ်။

အဲဒီ နားလည်မှုစာချွန်လွှာအရ ၂၀၂၂ ခုနှစ်ကနေ ၂၀၂၇ ခုနှစ်အထိ မြန်မာနိုင်ငံကနေ ဘင်္ဂလားဒေ့ရှ်နိုင်ငံကို နှစ်စဉ်အများဆုံး ဆန်ဖြူတန်ချိန် ၂ သိန်းခွဲနဲ့ ပေါင်းဆန်တန်ချိန် ၅၀,၀၀၀ ကို တင်ပို့ရောင်းချနိုင်မယ်လို့ သိရပါတယ်။

မြန်မာနိုင်ငံဟာ ပြည်ပကို နှစ်စဉ် ဆန်တန်ချိန် ၂ သန်းအထက် တင်ပို့လေ့ရှိပြီး အခုဘဏ္ဍာနှစ် ၇ လ အတွင်းမှာ  ၁ ဒသမ ၃၆သန်းကျော် တင်ပို့ထားပြီး ဖြစ်ပါတယ်။

ပြီးခဲ့တဲ့ ၂၀၂၃-၂၄ ဘဏ္ဍာနှစ်မှာတော့ ဆန်နဲ့ ဆန်ကွဲ တန်ချိန် ၁ ဒသမ၇ သန်း နီးပါးပဲ ပြည်ပကို တင်ပို့နိုင်ခဲ့ပြီး  ဧည့်မထအုပ်စုဆန်တွေ ဖြစ်တဲ့ ကရင်မ၊ ထွန်းပု၊ ငစိန် စတဲ့ ဆန်တွေ၊ ပေါင်းဆန်‌တွေကိုပဲ အဓိကတင်ပို့နေတာပါ။

မြန်မာနိုင်ငံက ဆန်တွေကို ဥရောပနိုင်ငံတွေဆီ အများဆုံးတင်ပို့ပြီး တရုတ်၊ ဖိလစ်ပိုင်နဲ့ ဒေသတွင်းနိုင်ငံတွေဆီလည်း တင်ပို့နေပါတယ်။