ရှမ်းပြည်နယ်တောင်ပိုင်း၊ တောင်ကြီးမြို့နယ်၊ အဝေရာမီးပုံပျံကွင်းမှာ တန်ဆောင်မုန်းလပြည့်ည နိုဝင်ဘာ ၁၅ ရက်နေ့က ညမီးကြီး ၄ လုံးနဲ့ စိန်နားပန် ၂ လုံး လွှတ်တင်ခဲ့ပြီး အရင်ရက်တွေကထက် လာရောက်ကြည့်ရှုသူ ပိုများတယ်လို့ မြို့ခံတွေက ပြောပါတယ်။
မီးပုံပျံလွှတ်တင်တာကို ည ၇ နာရီလောက်မှစပေမဲ့ ညနေ ၄ နာရီခွဲလောက်ကတည်းက ကွင်းအတွင်း လူတဝက်နီးပါးလောက်ပြည့်နေတာကိုတွေ့ရပြီး မီးပုံပျံကွင်းလယ်က မီးပုံလွှတ်မယ့်နေရာ ပတ်လည်ကို သံဇကာခတ်ထားပြီး သက်ဆိုင်သူတွေပဲ ဝင်ခွင့်ရကြပါတယ်။
မြို့ခံတယောက်က “အရင်နှစ်ကထက်လည်း ပိုစည်တယ်။ လူလည်း ပိုများတယ်။ စတိတ်ရှိုးပွဲတော့ လူအပြည့်ပဲ” လို့ ပြောပါတယ်။
ရိုးရာပွဲဖြစ်ပေမဲ့ ရိုးရာအင်္ကျီ၊ ဒေသလက်မှုပစ္စည်းနဲ့ အစားအသောက်တွေထက် အသင့်စား အကင်ဆိုင်တွေနဲ့ ဘီယာဆိုင်တွေပဲ ပိုများတာတွေ့ရသလို ညနေ ၆ နာရီလောက်ကနေ ည ၁၂ နာရီအထိ ကွင်းအနောက်ဘက် ဖျော်ဖြေရေးစင်မှာ ဒီဂျေတေးဂီတ K-pop နဲ့အတူ ကခုန်ပေါက်နေတဲ့ လူငယ်၊ လူရွယ်အများစုကို တွေ့ရပါတယ်။
