ရခိုင်ပြည်နယ်၊ အမ်းမြို့နယ်ထဲက စစ်ကောင်စီတပ်ရဲ့ အနောက်ပိုင်းတိုင်းစစ်ဌာနချုပ် (နပခ) ကို ထိုးစစ်ဆင် တိုက်ခိုက်နေစဉ်အတွင်း အာရက္ခတပ်တော် (AA) က သိမ်းပိုက်ထားခဲ့တဲ့ တပ်စခန်းတွေထဲက မှတ်တမ်းပုံတချို့ကို  နိုဝင်ဘာ ၁၄ ရက်မှာ ထုတ်ဖော်ပြသပါတယ်။

နပခ လက်အောက်ခံ တပ်တွေထဲက အာရက္ခတပ်တော် သိမ်းပိုက်ထားနိုင်တဲ့ တပ်ရင်း တပ်ခွဲ ၈ ခုထိ ရှိလာပြီဖြစ်ကြောင်း သိရပါတယ်။

အဲဒီ တပ်ရင်း တပ်ဖွဲ့ ၈ ခုမှာ စစ်ဖက်ရေးရာလုံခြုံရေးတပ် (စရဖ - စရတ) ဌာနချုပ်ရုံး၊ အမှတ် ၃၇၃ ခြေမြန်တပ်ရင်း၊ အမှတ် ၃၄၅ စစ်လက်နက်ပစ္စည်းတပ်ခွဲ၊ အမှတ်-၂ ခုတင် ၃၀၀ တပ်မတော်စစ်ဆေးရုံ၊ အမှတ် ၈ တိုက်ပွဲဝင်စည်းရုံးရေးသင်တန်းကျောင်းနဲ့ အမှတ် ၃၇၄ အမြောက်တပ်ရင်း၊ အမှတ် ၇၅၇ လျှပ်စစ်အလုပ်ရုံတပ်ခွဲအပြင် လေကြောင်းရန်ကာကွယ်ရေးတပ်တို့ ပါဝင်ကြောင်း AA က ထုတ်ပြန်ခဲ့တာပါ။

အလားတူ အာရက္ခတပ်တော် (AA) က သိမ်းပိုက်ဖို့ ကျန်ရှိနေသေးတဲ့ အနောက်ပိုင်းတိုင်းစစ်ဌာနချုပ် (နပခ) အပါအဝင် နပခလက်အောက်ခံ တပ်ရင်းတပ်ခွဲတွေ ဖြစ်တဲ့ အမှတ် ၉၄၆ ဆောက်လုပ်ရေးအင်ဂျင်နီယာတပ်ခွဲ၊ အမှတ် ၃၇၁ ခြေမြန်တပ်ရင်း၊ အမှတ် ၃၇၂ ခြေမြန်တပ်ရင်း၊ အမှတ် ၇၅၇/၂ လျှပ်စစ်အလုပ်ရုံတပ်ခွဲ၊ အမှတ် ၉၂၆ ထောက်ပံ့နဲ့ ပို့ဆောင်ရေးတပ်ခွဲ၊ အမှတ် ၉ ဆက်သွယ်ရေးလုံခြုံမှုတပ်ရင်း၊ အမှတ် ၈ အဆင့်မြင့်ဆက်သွယ်ရေးတပ်ရင်း၊ အမှတ် ၁၀ တပ်ထိန်းတပ်ခွဲနဲ့ အမှတ် ၉၁၉ စစ်မြေပြင်အင်ဂျင်နီယာတပ်ရင်း စုစုပေါင်း ဌာနချုပ်/တပ်ရင်း/တပ်ခွဲပေါင်း ၁၀ ခုကိုလည်း ထိုးစစ်ဆင် တိုက်ခိုက်နေကြောင်း AA ထုတ်ပြန်ချက်မှာ ရေးသားထားပါတယ်။

အာရက္ခတပ်တော်အနေနဲ့ လက်ရှိသိမ်းပိုက်ရရှိထားတဲ့ တပ်ရင်းတပ်ခွဲ ၈ ခုကနေ ထွက်ပြေးလွတ်မြောက်နေကြတဲ့ စစ်ကောင်စီတပ်ဖွဲ့ဝင်တွေကို လိုက်လံချေမှုန်း တိုက်ခိုက်နေတဲ့အတွက် အနောက်ပိုင်းတိုင်းစစ်ဌာနချုပ် (နပခ) တည်ရှိရာ ဝန်းကျင်မှာ တိုက်ပွဲတွေ ဆက်လက်ပြင်းထန်နေဆဲဖြစ်ကြောင်း အာရက္ခတပ်တော် (AA) သတင်းနဲ့ ပြန်ကြားရေးအဖွဲ့က အသိပေး ထုတ်ပြန်ထားပါတယ်။