လက်ထောက်နည်းပြ နစ္စတယ်ရွိုင်းဟာ အသင်းကနေ ထွက်ခွါမှာဖြစ်ကြောင်း မန်ယူနိုက်တက်အသင်းက အတည်ပြုသွားပါတယ်။
ပြီးခဲ့တဲ့ တနင်္ဂနွေနေ့က ကစားခဲ့တဲ့ လက်စတာနဲ့ပွဲမှာ ယာယီနည်းပြ နစ္စတယ်ရွိုင်း ကိုယ်တိုင်က နည်းပြသစ်အာမိုရင် လက်အောက်မှာ အသင်းကို တထောင့်တနေရာကနေ ကူညီ သွားချင်ကြောင်း ပြောခဲ့ပေမဲ့ အဆုံးသတ်မှာ အသင်းကနေ ထွက်ခွါဖို့ ဖြစ်လာခဲ့တာပါ။
နည်းပြသစ် အာမိုရင်ဟာလည်း စပို့တင်းမှာလက်တွဲလာတဲ့ နည်းပြအဖွဲ့ဝင် ၅ ယောက်ကို မန်ယူအသင်းဆီခေါ်ဆောင်လာခဲ့ပြီး နစ္စတယ်ရွိုင်းနဲ့ လမ်းခွဲဖို့ ဆုံးဖြတ်ခဲ့တာပါ။
နစ္စတယ်ရွိုင်းဟာ ယာယီနည်းပြအဖြစ် ၄ ပွဲကိုင်တွယ်ခဲ့တာမှာ ရှုံးပွဲမရှိပဲ အောင်အောင်မြင်မြင် ကိုင်တွယ်နိုင်ခဲ့တာပါ။
နစ္စတယ်ရွိုင်း အသင်းကနေ ထွက်ခွါတော့မှာဖြစ်ပေမဲ့ အသင်းဂန္ထဝင်ကစားသမား တယောက်အဖြစ် အမြဲတမ်းရှိနေမှာ ဖြစ်ကြောင်း မန်ယူအသင်းရဲ့ ထုတ်ပြန်ချက်မှာပါရှိပါတယ်။
နစ္စတယ်ရွိုင်းအပါအဝင် တခြားနည်းပြ အဖွဲ့ဝင် ၃ ယောက်ဟာလည်း အသင်းကနေ ထွက်ခွါမှာဖြစ်ကြောင်း မန်ယူအသင်းက ထုတ်ပြန်သွားပါတယ်။
Photo: Reuters
