တနင်္သာရီတိုင်း၊ တနင်္သာရီမြို့နယ်မှာ စစ်ကောင်စီက လေကြောင်းနဲ့ တိုက်ခိုက်တာကြောင့် အရပ်သားတယောက် ထိခိုက်ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
နိုဝင်ဘာ ၄ ရက် မနက် ၁၁ နာရီခွဲဝန်းကျင်မှာ ဘန်းပြည့်ကျေးရွာနဲ့ ကိုးအင်းကျေးရွာကို စစ်ကောင်စီဘက်က K 8W ဂျက်ဖိုက်တာနဲ့ ဗုံးသီးချ တိုက်ခိုက်ခဲ့တယ်လို့ ဒေသခံတွေက ပြောပါတယ်။
ကိုးအင်းရွာခံ မျက်မြင်တွေ့ရှိသူတယောက်က “အိမ်နားဝန်းကျင် ဗုံးသီး ၄ လုံး ပစ်ချလိုက်တာ။ ကွမ်းပင်အဖျားမှာထိတဲ့တလုံးက သားငယ်ကို ထိသွားတာပေါ့။ ကွမ်းပင်တွေဆို ကျွတ်ကုန်တယ်။ အိမ်ကအမိုးတွေ ပျက်စီးသွားတယ်” လို့ ပြောပါတယ်။
ဘန်းပြည့်ကျေးရွာမှာတော့ စစ်ကောင်စီဘက်က လေကြောင်းနဲ့ ပေါင် ၂၅၀ ဗုံးသီး ၂ လုံးချခဲ့ပြီး ထိခိုက်သေဆုံးမှု မရှိဘူးလို့ ဒေသခံတွေက ပြောပါတယ်။
ထိခိုက်ဒဏ်ရာတဲ့ အသက် ၃၀ ဝန်းကျင် ကိုးအင်းရွာခံ အမျိုးသားမှာတော့ ခြေချင်းဝတ်မှာ ဗုံးသီးစထိမှန်ပြီး ထိခိုက်ဒဏ်ရာရကာ PDF စိုးမိုးနယ်မြေရဲ့ ဆေးခန်းတခုမှာပဲ ဆေးဝါးကုသမှု ခံယူနေရပါတယ်။
