နိုဝင်ဘာ ၁၂ ရက်ကနေ ၁၇ ရက်အထိ ကျင်းပမယ့် ၁၅ ကြိမ်မြောက် တရုတ်နိုင်ငံတကာ လေကြောင်းနဲ့ အာကာသပြပွဲ (ကျူးဟိုင် လေကြောင်းပြပွဲ) အတွက် တရုတ်နိုင်ငံတောင်ပိုင်း ကျူးဟိုင်မြို့ဆီ တရုတ်လေတပ်က တိုက်လေယာဉ်တွေ အများအပြား ဆက်တိုက် ရောက်လာနေပါတယ်။
ရောက်လာတဲ့ လေယာဉ်တွေထဲမှာ အသံထက်မြန်တဲ့၊ ဘက်စုံသုံး တိုက်လေယာဉ် J-10C၊ ပြည်တွင်းမှာ တီထွင်ထားပြီး အမြင့်နဲ့ တာဝေးထိ ပျံသန်းနိုင်တဲ့ WZ-7 နဲ့ WZ-10 ကင်းထောက်ဒရုန်းတွေနဲ့ အကြီးစား သယ်ယူပို့ဆောင်ရေးလေယာဉ် Y-20 နဲ့ Y-9 တို့ ပါပါတယ်။
JL-10 လေ့ကျင့်ရေးလေယာဉ် ၂ စင်းဟာ တနင်္ဂနွေနေ့ မနက်ပိုင်းမှာ ကျူးဟိုင် ကျင်းဝမ် လေဆိပ်ဆီ ရောက်လာခဲ့ပါတယ်။
လေယာဉ်တစီးက ပြပွဲမှာ အငြိမ်ပြသထားမှာဖြစ်ပြီး နောက်တစီးကတော့ အခမ်းအနားမှာ ဝေဟင်စွန့်စားခန်းတွေ အစွမ်းပြမှာပါ။
အင်ဂျင် ၂ လုံးတပ်၊ ထိုင်ခုံ ၂ လုံးတပ် ဘက်စုံသုံး တိုက်လေယာဉ် J-16၊ တရုတ်နိုင်ငံက ကိုယ်တိုင်ထုတ်လုပ်ထားတဲ့ တာလတ်နဲ့ တာဝေး ပျံသန်းနိုင်တဲ့ ဗုံးကြဲလေယာဉ် H-6K နဲ့ တခြား လေယာဉ်အမျိုးအစားတွေလည်း နောက်ပိုင်းမှာ ထပ်ရောက်လာဖို့ ရှိပါတယ်။
ဒီလေကြောင်းပြပွဲဟာ နိုင်ငံနဲ့ ဒေသပေါင်း ၄၇ ခုက ကုမ္ပဏီပေါင်း ၁,၀၂၂ ခုကို ဆွဲဆောင်နိုင်မယ်လို့ မျှော်လင့်ထားပါတယ်။
ရုရှား၊ ပြင်သစ်၊ အမေရိကန်၊ ဆော်ဒီအာရေဗျနဲ့ အီတလီတို့ကလည်း အုပ်စုတွေအလိုက် ၂ နှစ်တခါ ကျင်းပတဲ့ အာကာသ ကုန်စည်ပြပွဲမှာ ပါဝင်ဆင်နွှဲမယ်လို့ CCTV သတင်းဌာနက သတင်းထုတ်ပါတယ်။
ပို့ကုန်အသားပေး နိုင်ငံတကာပွဲတခုအနေနဲ့ ကျူးဟိုင်လေကြောင်းပြပွဲဟာ တရုတ်နိုင်ငံရဲ့ စစ်လေယာဉ်တွေ အထူးသဖြင့် နောက်ဆုံးပေါ် မော်ဒယ်တွေကို အနီးကပ်ကြည့်ဖို့ ရှားရှားပါးပါး နေရာတခုဖြစ်ပါတယ်။
Source : Reuters
