မကွေးတိုင်း၊ ဆောမြို့နယ်က ကံချောင်းရွာကို စစ်ကောင်စီတပ်က အောက်တိုဘာ ၃၀ ရက် ည ၁၂ နာရီလောက်မှာ လေကြောင်းကနေ ဗုံးကြဲတာကြောင့် ၁၂ နှစ်အရွယ် ကလေးတယောက် အပါအဝင် ဒေသခံ ၄ ယောက် ဒဏ်ရာရခဲ့သလို နေအိမ်တချို့လည်း ပျက်စီးခဲ့တယ်လို့ ဆောမြို့နယ် ပြည်သူ့အုပ်ချုပ်ရေးအဖွဲ့ထံက သိရပါတယ်။
အဖွဲ့ပြောရေးဆိုခွင့်ရှိသူတယောက်က “ကံချောင်းရွာကို ညသန်းခေါင် ဂျက်ဖိုက်တာနဲ့ ပေါင် ၂၅၀ ဗုံး ၂ လုံး ကြဲချသွားခဲ့တာပါ” လို့ ပြောပါတယ်။
ဗုံးကြဲတာကြောင့် နေအိမ် ၁၀ လုံးနီးပါး ပျက်စီးသွားသလို အသက် ၁၂ အရွယ် ကလေး၁ ယောက် အပါအ၀င် ဒေသခံ ၄ ယောက် ဒဏ်ရာရခဲ့တယ်လို့ ဆိုပါတယ်။
ဆောမြို့နယ် ပြည်သူ့အုပ်ချုပ်ရေးအဖွဲ့ရဲ့ တာ၀န်ရှိသူက “ပျက်စီးတဲ့ အိမ် ၁၀ လုံးမှာ ၆ လုံး ကတော့ လုံး ၀ပျက်စီးသွားတယ်။ ဒဏ်ရာရတာက ၅ တန်းကျောင်းသူ ၁ ယောက်နဲ့ အမျိုးသား ၃ ယောက်ပါ။ ဆေးကု နေပါတယ်။ အသက်အန္တရာယ်စိုးရိမ်ရတဲ့ အခြေအနေမရှိဘူး”လို့ ပြောပါတယ်။
အခုလို စစ်တပ်က လေကြောင်းတိုက်ခိုက်တာကို ဆက်လုပ်လာမှာကို စိုးရိမ်တဲ့အတွက် ကံချောင်းရွာနဲ့ အနီးနားရွာက ရွာသားတွေဟာ နေရပ်စွန့်ပြီး ရွှေ့ပြောင်းနေနေကြရတယ်လို့ သိရပါတယ်။
