ကရင်ပြည်နယ်၊ ကြာအင်းဆိပ်ကြီးမြို့နယ်၊ သံပုရာချောင်းဖျားကျေးရွာအနီး အောက်တိုဘာ ၂၅ ရက် နေ့လယ်ပိုင်းမှာ စစ်ကောင်စီတပ်က တိုက်လေယာဉ်နဲ့ ဗုံးကြဲတိုက်ခိုက်ခဲ့တာကြောင့် ဒေသခံတယောက် သေဆုံးကာ တယောက် ထိခိုက်ဒဏ်ရာ ရရှိခဲ့ကြောင်း ကရင်အမျိုးသားအစည်းအရုံး (KNU) ဗဟိုထံက သိရပါတယ်။
ကရင်အမျိုးသားအစည်းအရုံး (KNU) ထိန်းချုပ်နယ်မြေဖြစ်တဲ့ ကြာအင်းဆိပ်ကြီးမြို့နယ်၊ သံပုရာချောင်းဖျားကျေးရွာအနီးကို အောက်တိုဘာ ၂၅ ရက် မနက်ပိုင်းက Y-12 တစီးနဲ့ ကင်းထောက်ခဲ့ကာ နေ့လယ်ပိုင်းမှာ ဗုံးကြဲချတိုက်ခိုက်ခဲ့တာလို့ KNU တပ်မဟာ ၆ နဲ့ နီးစပ်သူတယောက်က ပြောပါတယ်။
“အဲဒီနေ့မနက် ၁၁ နာရီ ၅ မိနစ်လောက်မှာ မှော်ဘီလေတပ်က Y-12 တစီးနဲ့ ကင်းလာထောက်ပြီး နေ့လယ် ၁၂ နာရီ ၄၈ လောက်မှာ နေပြည်တော်က တိုက်လေယာဥ် Yak-130 တစီးနဲ့ ပေါင် ၅၀၀ ဗုံး ၂ လုံး လာကြဲသွားတာ။”
စစ်ကောင်စီ လေကြောင်းတိုက်ခိုက်မှုကြောင့် ဒေသခံ အသက် ၃၀ ကျော်အရွယ် စောသဲမူး သေဆုံးခဲ့ကာ အသက် ၃၃ နှစ်အရွယ် နော်အဲ့တာမူးမှာ ဗုံးစထိမှန် ဒဏ်ရာရရှိခဲ့ကြောင်း သိရပါတယ်။
ဒါ့အပြင် လူနေအိမ် ၂ လုံးနဲ့ ခရစ်ယာန်ဘုရားကျောင်းတကျောင်းလည်း ထိခိုက်ပျက်စီးခဲ့ပါတယ်။
အလားတူ အောက်တိုဘာ ၂၆ ရက် ညပိုင်းကလည်း ကျုံဒိုးမြို့အခြေစိုက် စစ်ကောင်စီတပ်ရင်း ခလရ ၅၄၅ နဲ့ ၅၄၆ တပ်က ကော့ကရိတ်မြို့နယ်၊ ညောင်ရိပ်သာကျေးရွာထဲကို လက်နက်ကြီးတွေနဲ့ ရမ်းသန်းပစ်ခတ်ခဲ့မှုကြောင့် ဒေသခံ ၂ ယောက် ထိခိုက်ဒဏ်ရာရ ရှိခဲ့သေးကြောင်း မြေပြင်သတင်းအရင်းမြစ်တွေထံက သိရပါတယ်။
စစ်တပ်အာဏာသိမ်းပြီးနောက်ပိုင်း ပြီးခဲ့တဲ့ ဇွန်လအထိ ၃ နှစ်ကျော်ကာလအတွင်း စစ်ကောင်စီအနေနဲ့ အရပ်သားတွေနေထိုင်တဲ့ ကျေးရွာတွေကို စစ်ကြောင်းထိုးတာအပြင် ရည်ရွယ်ချက်ရှိရှိ လက်နက်ကြီးနဲ့ လေကြောင်းက ပစ်ခတ်တိုက်ခိုက်တာတွေကြောင့် KNU ကော်သူးလေ အုပ်ချုပ်နယ်မြေ ဒူးပလာယာခရိုင်အတွင်း ဒေသခံ ၂၁၀,၂၆၅ ယောက် နေရပ်စွန့်ခွာ ထွက်ပြေးတိမ်းရှောင်နေရတယ်လို့ သိရပါတယ်။
