စစ်ကိုင်းတိုင်း၊ ဘုတလင်မြို့နယ်မြောက်ပိုင်းက ကျေးရွာတွေကို စစ်ကောင်စီတပ်က မြေပြင်စစ်ကြောင်းထိုးတာတွေအပြင် အောက်တိုဘာ ၂၇ ရက်​ ညနေ ၆ နာရီဝန်းကျင်ကလည်း လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံတွေထံက သိရပါတယ်။

မနေ့ညနေက ဂျက်တိုက်လေယာဉ် ၂ စီးနဲ့ ဘုတလင်မြောက်ပိုင်းက မြင်သာ၊ လက်ပံ၊ နတ်ရွာတွေဘက်ကို ဗုံးကြဲသွားတာလို့ စစ်ဘေးရှောင်အရေး ကူညီဆောင်ရွက်ပေးနေသူ တယောက်က ပြောပါတယ်။

အဆိုပါ ဗုံးကြဲတိုက်ခိုက်မှုကြောင့် ရွာသားတွေ ထိမှန်သေဆုံးဒဏ်ရာရမှုနဲ့  အိုးအိမ်တွေ ထိခိုက်ပျက်စီးတဲ့ အခြေအနေတွေကိုတော့ လတ်တလော မသိရသေးပါဘူး။

ဘုတလင်မြို့နယ်​ထဲကို အခုလဆန်းပိုင်းကစတင်ပြီး စစ်​ကောင်စီလက်အောက်ခံ အနောက်မြောက်တိုင်းစစ်ဌာနချုပ် (နမခ) က စစ်ကြောင်းထိုး ဝင်ရောက်နေပြီး ဒေသခံပြည်သူတွေကို ဖမ်းဆီးသတ်ဖြတ်​သလို လူနေအိမ်တွေကိုလည်း မီးရှို့ဖျက်ဆီးနေတာ ဖြစ်ပါတယ်။

ဘုတလင်မြို့နယ် ပြည်သူ့ကာကွယ်ရေးတပ်ဖွဲ့ရဲ့ တာဝန်ခံတယောက်က “မြေပြင်စစ်ကြောင်းမှာ အင်အား ၁၅၀ လောက်ပါတယ်။ မြောက်ပိုင်းက ပဲပြစ်တောရွာကို ဝင်ပြီး ရွာခံတွေကို လူသားဒိုင်းအနေနဲ့ ဖမ်းသွားတယ်။ ဖမ်းသွားတဲ့ ဓားစာခံတွေကို သူတို့စစ်ကြောင်းရဲ့ ရှေ့ကနေ သွားခိုင်းနေတယ်။ လေကြောင်းကလည်း ရှေ့​ကနေကြိုပြီး ဗုံးကြဲနေတာလို့ မြေပြင်ကနေ သိရတယ်” လို့ DVB ကို ပြောပါတယ်။

အဆိုပါစစ်ကြောင်းဟာ ပြီးခဲ့တဲ့ရက်ပိုင်းက စီပါကျေးရွာကို ဝင်ရောက်ပြီး ဒေသခံပြည်သူ အယောက် ၂၀ ကျော်ကို အကြောင်းမဲ့သတ်ဖြတ်ကာ စီပါကျေးရွာအပြင် ဘုတလင်မြို့ပေါ်က မြောက်ပြင်ရပ်ကွက်နဲ့ ဗန္ဓုလကွက်သစ်ရပ်ကွက်တွေကို စီးနင်းဝင်ရောက်ခဲ့ပြီး ဒေသခံပြည်သူ ၁၀၀ နီးပါးကိုလည်း ဖမ်းဆီးခေါ်ဆောင်သွားပါတယ်။

စစ်​ကောင်စီတပ်က ဒေသခံပြည်သူတွေကို ဖမ်းဆီး၊ သတ်ဖြတ်၊ လူနေအိမ်တွေကို မီးရှို့နေတာကြောင့် စီပါ၊ ပဲပြစ်တော၊ ဖိုကုန်း၊ စိုင်းပြင်လေးကျေးရွာတွေ အပြင် အနီးအနားကျေးရွာတွေက ထောင်နဲ့ချီတဲ့ ဒေသခံပြည်သူတွေဟာ ဘေးလွတ်ရာကို ထွက်ပြေး တိမ်းရှောင်နေကြရပါတယ်။