စစ်ကိုင်းတိုင်း၊ စစ်ကိုင်းမြို့နယ်၊ မင်းကွန်းတိုက်နယ် မယ်တော်ကြီးဘုရားအရှေ့က ထမင်းဆိုင်မှာ အောက်တိုဘာ ၁၆ ရက် မနက် ၁၁ နာရီလောက်က အရပ်ဝတ်နဲ့ထိုင်နေတဲ့ ရဲတပ်ဖွဲ့ဝင်တွေ တိုက်ခိုက်ခံရပြီး ၃ ယောက် သေဆုံးခဲ့တယ်လို့ သိရပါတယ်။

တိုက်ခိုက်မှုအတွင်း အပြန်အလှန်ပစ်ခတ်မှုဖြစ်ပြီး ထမင်းဆိုင်ပိုင်ရှင် သားအဖ ၃ ယောက် ထိခိုက်ဒဏ်ရာ ရရှိခဲ့ပြီးနောက် ဆိုင်ရှင်ရဲ့ သမီးဖြစ်သူ သေဆုံးခဲ့တယ်လို့ သိရပါတယ်။

Wetlet information network တာဝန်ခံ ကိုနဂါးလေးက “မင်းကွန်းရွာထဲက ထမင်းဆိုင်မှာ အရပ်ဝတ်နဲ့ ထမင်းစားနေတဲ့ကောင်တွေကို ဝင်ပစ်တာ ရဲ ၃ ယောက် သေတယ်၊ သေနတ် ၂ လက်ရတယ်လို့လည်း ကြားတယ်ဗျ။ နှစ်ဦးနှစ်ဖက် ပစ်ကြတော့ ဆိုင်ရှင်သားအဖ ၃ ယောက် ထိသွားတယ်၊ သူ့သမီးကတော့ ဆုံးသွားပြီ ကြားတယ်ဗျ” လို့ ပြောပါတယ်။

ပစ်ခတ်မှုဖြစ်ပွားပြီးနောက် စစ်ကောင်စီနဲ့ ရဲတပ်သားတွေက အခင်းဖြစ်တဲ့ ထမင်းဆိုင်နဲ့ မင်းကွန်းရွာထဲက လူမနေတဲ့ နေအိမ်တွေကို မီးရှို့သွားတယ်လို့ သိရပါတယ်။

တိုက်ခိုက်မှုနဲ့ပတ်သက်ပြီး ဘယ်အဖွဲ့ကမှ ထုတ်ပြန်လာတာ မရှိသေးသလို စစ်ကောင်စီတပ်ဘက်ကတော့ မင်းကွန်း-စစ်ကိုင်းလမ်းမှာ လုံခြုံရေး တင်းကျပ်ချထားပြီး စစ်ဆေးနေ ပါတယ်။