စစ်ကိုင်းတိုင်း၊ ကန့်ဘလူမြို့နယ်၊ အင်းလယ်ကြီးကျေးရွာကို စစ်ကောင်စီတပ်က အောက်တိုဘာ ၁၂ ရက်နေ့ မနက် ၁ နာရီခွဲဝန်းကျင်မှာ ဒရုန်းနဲ့ဗုံးကြဲချခဲ့တာကြောင့် ကလေး၂ ယောက် အပါအဝင် ဒေသခံပြည်သူ ၄ ယောက် သေဆုံးသွားပြီး ၅ ယောက် အပြင်းအထန် ဒဏ်ရာရသွားပါတယ်။
ကန့်ဘလူ ၆၀၀၆ စစ်ကောင်စီတပ်နဲ့ ပြည်သူ့စစ်တွေပူးပေါင်းတိုက်ခိုက်ခဲ့တာလို့ ဒေသခံတွေက ပြောပြီး နေအိမ်အချို့လည်းပျက်စီးသွားတယ်လို့ သိရပါတယ်။
ဒေသခံတယောက်က “ညအချိန်မတော်ကြီးကို ကြဲချတာ။ ည ၁ နာရီနီးပါးအချိန်က လူအများစု အိပ်ကောင်းတဲ့ အချိန်ပဲဗျာ။ ဘာတိုက်ပွဲမှမရှိဘဲ ဗုံးသီးကြဲချသွားတာ။ အဲလိုဒရုန်းယာဉ်နဲ့ ဗုံးသီးချလို့ ပြည်သူနေအိမ်တွေပေါ် ကျတယ်။ ပွဲချင်းပြီး သားအမိ ၃ ယောက် သေတယ်။ ဆေးရုံရောက်မှ တဦးသေတယ်” လို့ ပြောပါတယ်။
အသက် ၃၄ နှစ်အရွယ် မဖြူဖြူဝင်းနဲ့ သူ့သမီးတွေဖြစ်တဲ့ ၄ နှစ်အရွယ် မသိမ့်သိမ့်ဖြူ၊ ၁၂ နှစ်အရွယ် မငြိမ်းအိဖြူတို့ ပွဲချင်းပြီးသေဆုံးပြီး အသက် ၃၉ နှစ်အရွယ် ကိုအောင်မျိုးဝင်းကတော့ ဆေးရုံမှာ သေဆုံးတယ်လို့ သိရပါတယ်။
ပြီးတော့ အသက် ၇၀ ဝန်းကျင်အရွယ် အဖိုးအဖွား ၂ ယောက်နဲ့ လူငယ် ၃ ယောက်လည်း ဒဏ်ရာ အပြင်းအထန်ရခဲ့ပါတယ်။
အမည်မဖော်လိုတဲ့ ကူညီဆောင်ရွက်ပေးနေသူတယောက်က “လေယာဉ်သံလို အကျယ်ကြီး မကြားရဘူး။ ဝီဝီဆိုတဲ့ အသံလောက်ပဲကြားရတာ။ စစ်သားတွေက ဒရုန်းနဲ့ချသွားတာဗျာ။ ကျနော်တို့ရွာက ပျူရွာစာရင်းမဝင်လို့ ဗုံးကြဲတာနေမှာ” လို့ DVB ကို ပြောပါတယ်။
ဒေသခံ ပြည်သူ့ကာကွယ်ရေးတာဝန်ရှိသူတယောက်ကလည်း သူတို့ သတင်းထောက်လှမ်းချက်အရ ဒရုန်းနဲ့ ၄ ကြိမ်လာပြီး ဗုံး ၈ လုံးကြဲချသွားတယ်လို့ သိရကြောင်း ဆိုပါတယ်။
“စစ်တပ်က ကန့်ဘလူ ၆၀၀၆ စစ်တပ်ကနေ စတင်ထွက်ခွာလာပြီး ကန့်ဘလူမြို့ရဲ့တောင်ဘက် နတ်ပေးရွာ-ငါတို့ရွာက ပစထ ရွာရဲ့တောင်ဘက် သိမ်ရင်ဆည် ရေပိုလွှဲကာကင်းစခန်းကနေ ကား ၃ စီးနဲ့ လာပြီး အခုလို ဗုံးကြဲသွားတာလို့ သိထားရတယ်ဗျ။ ကျနော်တို့နဲ့လည်း တိုက်ပွဲမဖြစ်ပါဘူးဗျာ။ သူတို့ပစ်ချင်လို့ကို သက်သက်ပစ်ချသွားတာပါ။ စကစ ပစထ စခန်းနဲ့ နီးစပ်တဲ့ ၄ မိုင်အတွင်းက ကျေးရွာတွေကို ကြိုတင်ရှောင်နေထိုင်ကြဖို့ကိုလည်း ပေးထားပါတယ်” လို့ ပြောပါတယ်။
အင်းလယ်ကြီးကျေးရွာဟာ ကန့်ဘလူမြို့ရဲ့တောင်ဘက် ၇ မိုင်လောက်မှာရှိပြီး ပြီးခဲ့တဲ့ နှစ်က စစ်တပ်က ရွာကို မီး ၂ ကြိမ် ရှို့သွားတာကြာင့် အိမ်ခြေ ၂၀၀ လောက် မီးလောင်ပျက်စီးခဲ့ပါသေးတယ်။
