မကွေးတိုင်း၊ ပခုက္ကူမြို့နယ်မှာ အောက်တိုဘာ ၉ ရက် နေ့လယ် ၁၂ နာရီဝန်းကျင်က ရဲတပ်ဖွဲ့ဝင်တယောက်ကို လက်နက်ခဲယမ်းတွေနဲ့အတူ အရှင်ဖမ်းဆီးရမိခဲ့တယ်လို့ PKU Thurain ရဲ့ ပြန်ကြားရေးတာဝန်ခံတယောက်က ပြောပါတယ်။ 

“ပခုက္ကူမြို့နယ်ထဲက အနောက်ဘုန်းကံ ပျူစောထီးရွာကို အနီးကပ် ချောင်းမြောင်းနေချိန်မှာ ကင်းပတ်ဖို့ ထွက်လာတဲ့ ရဲတပ်သားတယောက်ကို ပစ်ခတ်ပြီး အရှင်ဖမ်းဆီးနိုင်ခဲ့တာ” လို့ ပြောပါတယ်။

အရှင်ဖမ်းဆီးရမိတဲ့ ရဲတပ်သားဆီကနေ G3 သေနတ် ၁ လက်၊ ကျည် ၂၀၃ တောင့်၊ ကာဘိုင်ကျည် ၂၀၈ တောင့်၊ ကာဘိုင်ကျည်ဘောက် ၄ ခု၊ AK ကျည် ၁၆ တောင့်၊ ၅.၅၆ ကျည် ၁၉၃ တောင့်နဲ့ လက်ပစ်ဗုံး ၂ လုံးတို့ သိမ်းဆည်းရရှိခဲ့တယ်လို့ ဆိုပါတယ်။

“စစ်ဆေးမှုတွေ ဆက်လက်ဆောင်ရွက်သွားမှာဖြစ်ပြီး ပေါ်ပေါက်ချက်တွေကို အထက်အဖွဲ့အစည်း အဆင့်ဆင့်ကို တင်ပြသွားမှာပါ။ ပေါ်ပေါက်ချက်တွေအရ အထက်အဖွဲ့အစည်းတွေရဲ့ ညွှန်ကြားချက်အရ အရေးယူဆောင်ရွက်မှုတွေကို ဆက်လက်ပြုလုပ်သွားမှာပါ” လို့ PKU Thurain ရဲ့တာဝန်ခံက DVB ကို ပြောပါတယ်။

အဆိုပါရဲတပ်ဖွဲ့ဝင်ကို PKU Thurain အဖွဲ့နဲ့အတူ PDF ပူးပေါင်းတပ်ဖွဲ့တွေ စုပေါင်းပစ်ခတ် ဖမ်းဆီးခဲ့တာလို့ သိရပါတယ်။