ချင်းပြည်နယ် ဟားခါးမြို့ပေါ်က စစ်ကောင်စီလက်အောက်ခံ ရဲတပ်ဖွဲ့ဝင်တယောက်ဟာ အောက်တိုဘာ ၈ ရက်မှာ လက်နက်ခဲယမ်းတွေနဲ့အတူ အလင်းဝင်လာတယ်လို့ CDF Hakha ဆီကနေ သိရပါတယ်။
CDF Hakha ရဲ့ ပြန်ကြားရေးတာ၀န်ခံက “ဟားခါးမြို့ပေါ်ရဲစခန်းမှာ တာ၀န်ကျနေတဲ့ ရဲတပ်သားတဦးက လက်နက်ခဲယမ်းတွေနဲ့အတူ မနေ့က အလင်း၀င်လာတာဖြစ်ပါတယ်။ သတ်မှတ်ထားတဲ့ ဆုကြေးငွေပေးအပ်ပြီး လုံခြုံစိတ်ချရတာနေရာကို ပို့ဆောင်ထားပြီးပါပြီ” လို့ ပြောပါတယ်။
စစ်ကောင်စီရဲ့ လက်အောက်ခံ၀န်ထမ်းတွေအနေနဲ့ အလင်းဝင်ပြီး နွေဦးတော်လှန်ရေးမှာ ပူးပေါင်း ပါဝင်လိုသူတိုင်း ချင်းပြည်ကာကွယ်ရေးတပ်ဖွဲ့-ဟားခါး (CDF Hakha) ကို အချိန်မရွေး ဆက်သွယ်နိုင်တယ်လို့ ဆိုပါတယ်။
CDF-Hakha ရဲ့ တာ၀န်ခံတယောက်က“ပြည်သူတရပ်လုံးကို အကြမ်းဖက်လုပ်ရပ်တွေလုပ်နေတဲ့ စစ်တပ်နဲ့စစ်ကောင်စီအောက်မှာ တာဝန်မထမ်းဆောင်လိုတော့ဘဲ လက်နက်ခဲယမ်းနဲ့အတူ အလင်းဝင်လာသူတွေကို နွေးနွေး ထွေးထွေးကြိုဆိုမှာဖြစ်တဲ့အပြင် ထိုက်သင့်တဲ့ဆုငွေချီးမြှင့်ပြီး လုံခြုံတဲ့နေရာရောက်တဲ့အထိ တာဝန်ယူတဲ့အတွက် အမြန်ဆုံးအလင်း၀င်ရောက်ကြဖို့ ဖိတ်ခေါ်ပါတယ်” လို့ DVB ကို ပြောပါတယ်။
ပြီးခဲ့တဲ့စက်တင်ဘာလဆန်းပိုင်းကနေ အခုအထိ ဟားခါးမြို့ပေါ်မှာ တာ၀န်ကျနေတဲ့ ဒုရဲအုပ် (၁ပွင့်ဗိုလ်) တဦးအပါအ၀င် ရဲတပ်ဖွဲ့၀င် ၅ ဦးအထိ CDF Hakha ဆီကို အလင်း၀င်ရောက်လာပြီး ဖြစ်တယ်လို့ သိရပါတယ်။
