ထိုင်းနိုင်ငံ၊ ချင်းမိုင်မြောက်ပိုင်းတခွင်မှာ ရေကြီးမှုကြီး ဖြစ်ပွားခဲ့အပြီး ရေပြန်ကျလာပြီ ဖြစ်တဲ့အတွက် အောက်တိုဘာ ၇ ရက်မှာ မြူနီစီပယ်က အကြီးစားသန့်ရှင်းရေတွေ လုပ်ဆောင်နေပြီလို့ ဘန်ကောက်ပို့စ် သတင်းစာက ဖော်ပြပါတယ်။
အလုပ်သမားတွေဟာ ထရပ်ကားတွေ၊ ရေကားတွေ အကူအညီနဲ့ ပင်းမြစ်ကိုဖြတ်တဲ့ တံတား ၃ စင်းတဝိုက်မှာ နုန်းမြေ အနည်အနှစ်တွေကို ရှင်းလင်းနေကြပါတယ်။
တခြားအဖွဲ့သားတွေနဲ့ စေတနာ့ဝန်ထမ်းတွေကတော့ ရေလွှမ်းမိုးမှုကြောင့် သွားလာရ မလွယ်ကူသေးတဲ့ အိမ်တွေကို ရေနဲ့ အစားအသောက်တွေ ပံ့ပိုးနေကြပါတယ်။
ကမ္ဘာလှည့်ခရီးသွား အလာများတဲ့ ချန်ကလန်နဲ့ ချရောင်ပရာသတ် အပါအဝင် အဓိက လမ်းမကြီး ၇ ခုရဲ့ တချို့လမ်းပိုင်းတွေကို ပိတ်ထားရဆဲဖြစ်တယ်လို့ ချင်းမိုင် မြူနီစီပယ်က ထုတ်ပြန်ပါတယ်။
ပင်းမြစ်ရေဟာ ဆက်ကျနေပြီး ၇ ရက်နေ့ မနက် ၁၀ နာရီမှာ နဝရတ် တိုင်းတာရေးစခန်းမှာ ၃ ဒသမ ၈၅ မီတာသာ ရှိတော့ပါတယ်။
ပင်းမြစ်ရေဟာ သမိုင်းတလျှောက် အမြင့်ဆုံးအဖြစ် စနေနေ့ညက ၅ ဒသမ ၃ မီတာအထိ တက်ခဲ့တာဖြစ်ပါတယ်။
ပင်းမြစ်ရေဟာ တနာရီကို ၄ ကနေ ၅ စင်တီမီတာအထိ ကျလာပြီး မကြာမီမှာ စိုးရိမ်ရေမှတ်အောက် ရောက်တော့မယ်လို့ မှန်းထားပါတယ်။ ရင်းနဲ့ တန်းမြစ်ရေလည်း ကျဆင်းသွားပြီဖြစ်တယ်လို့ဆိုပါတယ်။
ဒီမြစ် ၂ စင်းဟာ ပင်းမြစ်ရဲ့ မြစ်လက်တက်တွေဖြစ်ပြီး ချင်းမိုင်မြောက်ပိုင်းကို ရေပေးဝေနေတာ ဖြစ်ပါတယ်။
Source-Reuters
